შპს „ევოლუშენ ჯორჯიამ“ 2021 წელს საკუთარი შემოსავალი 50.7 მილიონი ლარით, 145.3 მილიონამდე გაზარდა. 2021 წლის ფინანსური ანგარიშის მიხედვით, კომპანიის წმინდა მოგება 6.1 მილიონი ლარიდან, 13.4 მილიონამდე გაიზარდა. „ევოლუშენ ჯორჯიას“ შემოსავალი დაფუძნებულია კომპანიის მიერ ლაივ-კაზინოს მომსახურების მიწოდებისას წარმოქმნილ შიდა ხარჯებზე და მასზე დამატებულ ტრანსფერების პროცენტზე.
რაც შეეხება ორგანიზაციის აქტივებს, 132,3 მლნ ლარამდე იყო, 2020 წელს კი 125 მლნ ლარს შეადგენდა. ვალდებულებების მოცულობა 2021 წლის ბოლოს 111 მილიონი ლარია, კაპიტალი კი 8 846 000 ლარიდან 20 956 000 ლარამდე გაიზარდა.
2018 წლის დასაწყისში თანამშრომლების რაოდენობა იყო 8 პირი. წლის ბოლოს ამ რაოდენობამ 1067-ს მიაღწია, 2019 წლის ბოლოს 2870 თანამშრომელი იყო, 2020 წლის ბოლოს-3558, ხოლო 2021 წლის ბოლოს, „ევოლუშენ ჯორჯიას“ 5953 თანამშრომელი ჰყავდა. 2021 წელს 5953 დასაქმებულის ხელფასების მოცულობა კი 93.6 მილიონ ლარამდე გაიზარდა. 2020 წელს კი კომპანია 3558 აადამიანს ასაქმებდა და მათ ხელფასებზე 43.3 მილიონი ლარი გასცა.
2021 წლისთვის კომპანია ლაივ ტრანსლაციას 532 მაგიდის მეშვეობით ახორციელებდა.
„ჯგუფი ქმნის, ავითარებს, აწარმოებს, სრულად ინტეგრირებულ ლაივ კაზინო გადაწყვეტებს აზარტული თამაშების ოპერატორებისთვის, ახორციელებს მის მარკეტინგს და გასცემს ლიცენზიებს. ის მონაწილეობს მხოლოდ განვითარებასა და შექმნაში, ხოლო თვითონ არ ახორციელებს აზარტული თამაშების ოპერირებას.
კაზინოს მომსახურებების ლაივ სტრიმინგი ხორციელდება კომპანიის მიერ იჯარით აღებულ უძრავ ქონებაზე აშენებული სტუდიების მეშვეობით,” – ნათქვამია კომპანიის ანგარიშში.
კომპანიის 100% წილის მფლობელს წარმოადგენს შპს Evolution Malta Holding Limited, მალტა, რომელიც თავის მხრივ, შვედური კომპანია Evolution Gaming Group AB-ს შემადგენლობაში შედის. კომპანიის დირექტორები არიან მარტინ ოლოფ კარლესუნდი და პოლ ჯესპერ ფონ ბაჰრი.
შეზღუდული პასუხისმგებლობის კომპანია „ევოლუშენ ჯორჯია“ საქართველოში დაფუძნდა 2017 წლის 29 მაისს. 2021 წლისა და 2020 წლის 31 დეკემბრისთვის კომპანიის უშუალო მშობელი კომპანია იყო შპს Evolution Malta Holding Limited, მალტა (შემდეგში „მშობელი კომპანია”) და კომპანიას არ ჰყავს საბოლოო მაკონტროლებელი მხარე. Evolution Malta Holding Limited LLC რამდენიმე კომპანიას ფლობს მსოფლიო მასშტაბით და მისი მფლობელია Evolution Gaming Group AB (საჯარო), შვედური საჯარო შეზღუდული პასუხისმგებლობის კომპანია, რომელიც საფონდო ბირჟაზე - Nasdaq Nordic Large Cap - არის რეგისტრირებული 2017 წლის 5 ივნისიდან. Evolution Gaming Group AB (საჯარო) და მისი შვილობილი საწარმოები (შემდეგში „ჯგუფი“) წარმოადგენს ლაივ კაზინო (Live Casino) სისტემების წამყვან „ბიზნესი ბიზნესისთვის“ (შემდეგში “B2B”) პროვაიდერს.
ევოლუშენ ჯორჯია
