ევრო 6 წლიან მინიმუმზეა. ევრო-დოლარის კურსი 1.06-ზე ნაკლები ბოლოს 2016 წლის დეკემბერში იყო. 1 წლის წინ 100 ევროს შესაძენად 122 დოლარი იყო საჭირო, 1 თვის წინ 112 დოლარი ახლა კი $106-ც საკმარისია. ევრო ლართან მიმართებაშიც გაუფასურდა. 2021 წლის 27 აპრილის ოფიციალური კურსი 4.18 ლარს შეადგენდა, მიმდინარე წლის 27 მარტის კურსი 3.55 იყო, დღეს კი ევროს ოფიციალური ღირებულება 3.25 ლარია.

ევრო, როგორც საერთო ევროპული ვალუტა, 1999 წელს გაეშვა ბრუნვაში, თუმცა პირველი 3 წელი მხოლოდ საბანკო სივრცეში არსებობდა. ფიზიკურად ბანკნოტებისა და მონეტების სახით კი 2002 წელს გამოჩნდა. 1999 წლის იანვარში 1 ევროს ღირებულება 1.20 დოლარს შეადგენდა. ზუსტად 1 წლის შემდეგ 1.01-ს. 2000 წლის თებერვლიდან 2002 წლის ოქტომბრამდე კურსი 1.00-ზე ნაკლები იყო. ყველაზე იაფი - 85 ცენტი ევრო 2000 წლის ოქტომბერში ღირდა. 2008 წლის აპრილში, პიკის მომენტში კი ევროს ღირებულება 1.58 დოლარს გაუტოლდა.

ევრო ევროკავშირის 27 სახელმწიფოდან 19 ქვეყნის ოფიციალური ვალუტაა. ევროზონაში სულ ევროკავშირის მოსახლეობის 77% - 343 მლნ ადამიანი ცხოვრობს.

მსოფლიო მასშტაბით ევრო აშშ დოლარის შემდეგ #2 სარეზერვო ვალუტაა, თუმცა მისი წილი სარეზერვო ვალუტებში დოლარისას 3-ჯერ ჩამორჩება და 20%-ს შეადგენს.