ბოლო 6 თვის მანძილზე ევროს კურსი ყველაზე მეტად, 1,6% -ით გაიზარდა. ბუნდესბანკის პრეზიდენტმა იოახიმ ნაგელმა აღნიშნა, რომ ცენტრალურმა ბანკმა უნდა გადადგას შემდგომი ნაბიჯები, იმ შემთხვევაში თუ ინფლაციის მაჩვენებელი იგივე დარჩება. გასულ კვირას ევროპის ცენტრალურმა ბანკმა ( ECB) მონეტარული პოლიტიკა აგრესიულად გაამკაცრა და 8 სექტემბერს, რეფინანსირების განაკვეთი 75 საბაზო პუნქტით გაზარდა, რაც მნიშვნელოვნად აღემატება ანალიტიკოსების პროგნოზს და ის ცენტრალური ბანკის დამოკიდებულების ცვლილებაზე მიუთითებს. Bloomberg-ის მონაცემების მიხედვით, დოლარი ბოლო ორი კვირის მანძილზე ყველაზე დაბალ ნიშნულზე იყო.
Bloomberg-ი წერს, რომ ევროს მიმართ ბაზარი მკვეთრად დაქვეითებულია, რადგან რუსეთი გაზის მიწოდების შეზღუდვას კვლავ განაგრძობს, ეს კი ინფლაციის და რეცესიის შესაძლებლობას ზრდის. ECB პოლიტიკის გამკაცრებაში ფედერალურ სარეზერვო ბანკს მიჰყვებოდა, რამაც ბოლო ათწლეულის მანძილზე ევროს ყველაზე დაბალ ნიშნულზე დაცემას შეუწყო ხელი.
მაშინ როდესაც ფონი დიდწილად უცვლელია, რთულია იმის მტკიცება, რომ ეს საბოლოო ცვლილებაა ევროს სავალუტო ბედში, ლონდონის დროით 11:35 საათზე bloomberg-ის სავალუტო პლატფორმაზე ერთი ევრო 1,0136 დოლარად ივაჭრებოდა.
„ECB-ის გადაწყვეტილებაზე მონეტარული პოლიტიკის გამკაცრების შესახებ დისკუსია კვლავ გრძელდება, თუმცა დარწმუნებული არ ვარ, რომ ეს აღმავალი ტრენდის დასაწყისია. ევროს გაუმჯობესება უნდა მოხდეს მაშინ, როდესაც ენერგომატარებლებზე ფასები დარეგულირდება“ - აღნიშნა Standard Bank -ის G-10 სტრატეგიის ხელმძღვანელმა სტივენ ბაროუმ.
ევრომ ასევე გაზარდა მოგება ფუნტთან მიმართებაში და 2021 წლის თებერვლის შემდეგ უმაღლეს მაჩვენებელზე 87,22 პენსამდე გაიზარდა.