ევროკავშირი ელექტრონული საბაჟოს ინიციატივით გამოდის. „ელექტრონული საბაჟო ინიციატივა“ (Electronic customs initiative) 17 IT სისტემის მკაფიოდ განსაზღვრულ ჩამონათვალსა და მათი განხორციელების მკაცრ გრაფიკს მოიცავს, რომელიც ევროკავშირის თითოეული წევრი სახელმწიფოსთვის სავალდებულოა.

ელ-საბაჟოს ინიციატივა ელ-მთავრობის საკითხებში ევროკომისიის კომუნიკეში (Commission Communication on e-Government) არის გაწერილი. ის, ასევე, ევროპული საბჭოს მიერ უქაღალდო ვაჭრობისა და საბაჟოს შესახებ მიღებულ რეზოლუციაში არის მოხსენიებული. ამ დოკუმენტების მიღბით, ევროკავშირის წევრმა ქვეყნებმა აიღეს ვალდებულება, ელ-საბაჟოს ინიციატივის მიზნებს მიაღწიონ.

ახალი სისტემა, სავარაუდოდ, 2025 წლის ბოლომდე სამ ეტაპად დაინერგება.

ელექტრონული საბაჟო ინიციატივის ძირითადი მიზანი გამარტივების გზით საბაჟო პროცედურებისა და პროცესების ეფექტიანობის გაუმჯობესებაა. ეს გულისხმობს საბაჟოებს შორის მონაცემთა ელექტრონულ გაცვლას ევროკავშირის მასშტაბით, რაც საჭიროების შემთხვევაში ნებისმიერი საბაჟო პროცედურას შეეხება, რომელიც ევროკავშირის საზღვრებზე საქონლის გადაადგილებასთან იქნება დაკავშირებული.

ინიციატივა ასევე გულისხმობს:

მეწარმეების მიერ საბაჟო დეკლარაციების ელექტრონულ ფორმატში, თავიანთ ოფისებიდან წარდგენას.

იმპორტიორტ-ექსპორტზე საბაჟო ჩანაწერების ელექტრონულად წარმოებას;

საბაჟო მიზნებისთვის ტრეიდერების რეგისტრაციას ევროკავშირის მხოლოდ ერთ წევრ ქვეყანაში მაშინაც კი, თუ ისინი საბაჟო ოპერაციებს ევროკავშირის სხვა წევრ ქვეყნებში ახორციელებენ.

იმპორტ-ექსპორტის ოპერაციებისთვის ტრეიდერების წვდომას საინფორმაციო პორტალებსა და ერთიან ელექტრონულ ბაზასთან.

საჭიროების შემთხვევაში კომპიუტერული სისტემების ურთიერთკავშირი საბაჟო სფეროს მიღმა არსებულ სისტემებთან, როგორიც არის, მაგალითად, ევროკავშირის ფარგლებში აქციზური საქონლის მოძრაობის მონიტორინგის სისტემა.

ელექტრონული ინფორმაციის გაცვლის შესაძლებლობა ყველა ორგანოსა და უწყებისთვის, რომლებიც იმპორტისა და ექსპორტის ოპერაციებში მონაწილეობენ, მათ შორის მესამე ქვეყნებთან, თუ ეს საერთაშორისო ხელშეკრულებით არის გათვალისწინებული. საბაჟო ამ ხელისუფლებისა და უწყებებისთვის ერთიანი ფანჯრის შექმნაში წამყვან როლს შეასრულებს.

„ერთ ფანჯარაში“ ანუ ერთ ადგილზე და ერთსა და იმავე დროს ყველა ფიზიკური შემოწმების განხორციელება.

ამ მიზნების მისაღწევად 17 IT სისტემა იქნება ჩართული.

BPN.GE