ევროკავშირი კრიპტოაქტივების რეგულირების ძირეულ წესებზე შეთანხმდა, რადგან ბიტკოინის ღირებულების რყევის გამო მთავრობებს სექტორის გაკონტროლება უჭირთ. ამის შესახებ ევროპარლამენტის მემარჯვენე-ცენტრისტმა დეპუტატმა, შტეფან ბერგერმა განაცხადა, რომელიც მოლაპარაკებებს პარლამენტის სახელით ხელმძღვანელობდა.
Reuters-ის ცნობით, ევროპარლამენტისა და ევროკავშირის ქვეყნების წარმომადგენლებმა კრიპტოაქტივების ბაზრის შესახებ კანონი (markets in crypto assets-MiCA) განიხილეს, რომელიც, სავარაუდოდ, 2023 წლის ბოლოს ამოქმედდება.
სააგენტოს შეფასებით, მსოფლიოში კრიპტოაქტივები მეტწილად დაურეგულირებელია. მაგალითად, ევროკავშირის ეროვნულ ოპერატორებს მხოლოდ ფულის გათეთრების წინააღმდეგ ბრძოლა მოეთხოვებათ.
„დღეს ჩვენ დავამყარეთ წესრიგი კრიპტოაქტივების „ველურ დასავლეთში“ და დავაწესეთ მკაფიო წესები ჰარმონიზებული ბაზრისთვის,“ - აცხადებს ბერგერი.
მისი თქმით, „ციფრული ვალუტების ღირებულების ბოლო ვარდნა აჩვენებს, თუ რამდენად სარისკო და სპეკულაციურია ისინი, საპასუხო მოქმედება კი ფუნდამენტურად აუცილებელია.“
ევროპარლამენტის დეპუტატი მწვანეთა პარტიიდან, ერნესტ ურტასუნი აცხადებს, რომ MiCA კრიპტოაქტივების პირველი და ყოვლისმომცველი რეჟიმი იქნება მსოფლიოში, რომელიც ბაზრის ბოროტად გამოყენებისა და მანიპულაციისგან დაცვის მკაცრ ზომებს მოიცავს.
ახალი კანონი კრიპტოაქტივების ემიტენტებსა და მასთან დაკავშირებული სერვისების მიმწოდებლებს მიანიჭებს „პასპორტს“, რომ კლიენტებს ევროკავშირის მასშტაბით ერთიანი ბაზიდან მოემსახურონ, რა დროსაც კაპიტალისა და მომხმარებელთა უფლებების დაცვის წესებს არ დაარღვევენ.
Reuters-ის ცნობით, შეერთებულ შტატებსა და ბრიტანეთს, რომლებიც კრიპტოაქტივების ორი მთავარი ცენტრია, მსგავსი წესები ჯერ არ დაუმტკიცებია.
მაისში კრიპტოაქტივები, TerraUSD-ისა და luna-ს ტოკენების დაშლის შემდეგ ზეწოლის ქვეშ მოექცა, ხოლო ივნისში კრიპტოვალუტის მსესხებლის მსხვილმა კომპანიამ, Celsius Network-მა თანხები და გადარიცხვები გაყინა. იმავე თვეს ბიტკოინი, დაახლოებით, 17 600 დოლარამდე დაეცა, გუშინ კი 18,900 დოლარად ივაჭრებოდა. ეს მეტად დაბალი მაჩვენებელია თუნდაც მარტის თვესთან შედარებით, როცა ბიტკოინის ღირებულება 48 200 დოლარს შეადგენდა.
ევროკავშირის გუშინდელი მოლაპარაკებები ფოკუსირებული იყო ისეთ საკითხებზე, როგორიც არის კრიპტოაქტივების ზედამხედველობა და მათი ენერგიის მოხმარება.
ევროპარლამენტარები შეთანხმდნენ, რომ კრიპტოაქტივების პროვაიდერებმა მომავალში ენერგიის მოხმარებისა და გარემოზე აქტივების ზემოქმედების მონაცემები საჯარო უნდა გახადონ.
დეპუტატ ერნესტ ურტასუნის ცნობით, კრიპტოკომპანიების მთავარი მარეგულირებლები ევროკავშირის ქვეყნები იქნებიან, თუმცა ბლოკის ფასიან ქაღალდებზე ზედამხედველ ორგანოს, ESMA-ს ჩარევის უფლებამოსილება ექნება, თუკი ინვესტორების დაცვას ან ფინანსურ სტაბილურობას საფრთხე დაემუქრება.