ევროკომისია ევროკავშირის ნარჩენების ტრანსპორტირების წესების გადახედვას მოითხოვს, რათა წევრ სახელმწიფოებს თავიანთი ნაგავი მარტივად ვეღარ შეჰქონდეთ ღარიბ ქვეყნებში, რომლებსაც ნარჩენების მართვის სუსტი რეგულაციები აქვთ. ამის შესახებ ევროკომისიის პრესსამსახურში აცხადებენ.
ახალი ინიციატივა, რომელიც ევროკავშირის ქვეყნებმა და ევროპარლამენტმა უნდა დაამტკიცოს, ბრიუსელის გეგმის ნაწილია და დაბინძურების შემცირებას, ასევე, პლასტმასის, ტექსტილისა და ლითონის ხელახალ გამოყენებასა და გადამუშავებას ეხება.
გასულ წელს ევროკავშირმა დაახლოებით, 33 მილიონი ტონა ნარჩენის ექსპორტი განახორციელა, აქედან, თითქმის, ნახევარი ღარიბ ქვეყნებში შევიდა, რომლებიც ეკონომიკური თანამშრომლობისა და განვითარების ორგანიზაციის (OECD) წევრები არ არიან. ამდენად, ამ ქვეყნებს ნარჩენების მართვის უფრო სუსტი რეგულაციები აქვთ, ვიდრე ევროკავშირს.
„ჩვენი მიზანია, ვაიძულოთ ევროკავშირი, წარმოქმნილ ნარჩენებზე მეტი პასუხისმგებლობა აიღოს. დღეს ასე არ ხდება, რაც აუცილებლად უნდა შეიცვალოს, - აცხადებს ევროკავშირის გარემოსდაცვითი პოლიტიკის ხელმძღვანელი, ვირჯინიუს სინკიავიჩიუსი.
ევროკომისიის ინიციატივის თანახმად, OECD-ის არაწევრმა ქვეყანამ ევროკავშირიდან ნარჩენების მიღებაზე თანხმობა ბრიუსელს წინასწარ უნდა აცნობოს და ამასთან, უნდა დაამტკიცოს, რომ მას ნარჩენების გადამუშავება ეკოლოგიურად სუფთა გზით შეუძლია. თუ ქვეყანა ამისთვის მზად იქნება, მხოლოდ ამის შემდეგ გაიგზავნება იქ ევროკავშირის ნარჩენები.
გარდა ამისა, OECD-ის წევრი სახელმწიფოებიდან ნარჩენების ექსპორტს მონიტორინგს ევროკავშირი გაუწევს. ბრიუსელს უფლება ექნება, ექსპორტი შეაჩეროს, თუკი დადასტურდება საფრთხე, რომ ასეთი ექსპორტი დაბინძურებას გამოიწვევს.
ევროკომისიის წინადადება მიზნად ისახავს, წაახალისოს 27 წევრი ქვეყანა, რომ მათ ნარჩენების ხელახალი გამოყენებისა და გადამუშავების შიდა შესაძლებლობები გააუმჯობესონ. ახალი ინიციატივა, ასევე, ამარტივებს ევროკავშირის საზღვრებში ნარჩენების ტრანსპორტირების რეგულაციებს, რათა პლასტმასის, ქაღალდის, რკინისა და ფოლადის გადამუშავება ევროპის საწარმოებში მოხდეს.
bpn.ge