ევროკომისიის პრეზიდენტის ურსულა ფონ დერ ლაიენის ინფორმაციით, ევროპა რუსეთისთვის სანქციების მე-6 პაკეტს ამზადებს. ამის შესახებ მან ტვიტერზე დაწერა. 

ლაიენი დარწმუნებულია, რომ რუსეთი დაეცემა, ხოლო უკრაინა ევროპული მომავლისკენ მიემართება. 

"ჩვენ, ვერასოდეს შევადარებთ რაიმეს, უკრაინელი ხალხის თავგანწირვას, მაგრამ ვახორციელებთ ჩვენი ეკონომიკური ძალის მობილიზებას, რათა პუტინმა ამისთვის გადაიხადოს. ჩვენ, რუსეთის წინააღმდეგ მკაცრი სანქციები დავაწესეთ და უკვე ვამზადებთ სანქციების მე-6 პაკეტს. რუსეთი დაეცემა, ხოლო უკრაინა ევროპული მომავლისკენ მიემართება," - წერს ლაიენი.

შეგახსენებთ,  ეკონომიკური ზეწოლის მიზნით, ევროკავშირმა რუსეთის წინააღმდეგ სანქციების მე-5 პაკეტი ოფიციალურად გუშინ მიიღო, რომლის მიხედვით, რუსეთიდან ენერგეტიკული რესურსის იმპორტი პირველად აიკრძალა. ევროკავშირი რუსული ნახშირის იმპორტის ყველა ფორმას კრძალავს.

ნახშირის იმპორტი სრულად აგვისტოდან აიკრძალება, თუმცა დღეიდან ახალი კონტრაქტების გაფორმება შეუძლებელი ხდება.

ევროკომისიის დთვლით, მხოლოდ ქვანახშირის აკრძალვით, რუსეთი წელიწადში 8 მილიარდ ევროს დაკარგავს. 

ნახშირის გარდა, ევროკავშირის ახალი სანქციები კრძალავს რუსეთიდან მრავალი სხვა საქონლისა და პროდუქტის იმპორტს, მათ შორის ხის, რეზინის, ცემენტის, სასუქების, მაღალი ხარისხის ზღვის პროდუქტების (როგორიცაა ხიზილალა) და ალკოჰოლური სასმელების (როგორიცაა არაყი), რაც, ჯამში, რუსეთს დამატებით  5,5 მილიარდი ევროს შემოსავალს დააკარგვინებს. 

ევროკავშირმა შეზღუდა რუსეთში რამდენიმე პროდუქტის ექსპორტიც, მათ შორის, თვითმფრინავის საწვავი, კვანტური კომპიუტერები, ნახევარგამტარები, მაღალი კლასის ელექტრონიკა და პროგრამები, ასევე, სატრანსპორტო აღჭურვილობა. აქედან, ევროკავშირის დატლით,  რუსეთის შემოსავალი წელიწადში 10 მილიარდი ევროთი შემცირდება. 

სანქციების ახალი პაკეტი  გულისხმობს აგრეთვე  ოთხ რუსულ ბანკთან, მათ შორის, VTB ბანკთან ტრანზაქციების სრულ აკრძალვას, ევროკავშირში მომუშავე რუსი და ბელარუსული სატვირთო გზების ოპერატორებისა და ევროკავშირში შესყიდვების ხელშეკრულებებში რუსეთის მოქალაქეებისა და კომპანიების მონაწილეობის სრულ აკრძალვას.

ევროკომისიის შეფასებით, მიღებული ზომები ევროკავშირში რუსული გემებისა და სატვირთოს შესვლას ზღუდავს, რაც კიდევ უფრო შეაფერხებს ვაჭრობას.

სანქციებისთვის გვერდის ავლის პრევენციისთვის  ახალი პაკეტით გაფართოვდა კრიპტოვალუტების გამოყენებასთან დაკავშირებული აკრძალვები.

ახალი სანქციების პაკეტის ფარგლებში კიდევ 217 ადამიანი დაემატა ევროკავშირის შავ სიას, რაც ნიშნავს, რომ ევროკავშირში მათი აქტივები გაიყინება და ისინი დაექვემდებარებიან ევროკავშირში მოგზაურობის აკრძალვას. ჯამში ევროკავშირის მიერ სანქცირებული ადამიანების რაოდენობა 900-მდე გაიზარდა.  

ბლოკი განიხილავს დამატებით სანქციების დაწესებას, მათ შორის, ნავთობის იმპორტთან დაკავშირებულ შეზღუდვებს.

რუსეთის ენერგეტიკულ იმპორტზე დამოკიდებულების შემცირება  ევროკავშირის უმთავრეს პრიორიტეტად სახელდება.