ევროკავშირის ელჩებმა რუსეთის წინააღმდეგ სანქციებზე ახალ შეთანხმებას მიაღწიეს, სანქციებს შორის არის რუსული ნავთობის გასაყიდ ფასზე ლიმიტის დაწესება, - ამის შესახებ ინფორმაციას politico ავრცელებს.

საუბარია მოსკოვის წინააღმდეგ სანქციების მე-8 ეტაპზე, რომელიც ევროკომისიის პრეზიდენტმა ურსულა ფონ დერ ლაინერმა გასულ კვირაში მას შემდეგ გამოაცხადა, რაც რუსეთის  პრეზიდენტი ბირთვული იარაღის გამოყენებით დაიმუქრა და  ასობით ათასი რეზერვისტის მობილიზება გამოაცხადა.

ევროკავშირის რიგმა ქვეყნებმა  ახალ ზომებთან, განსაკუთრებით კი ნავთობის ფასის ლიმიტთან დაკავშირებით შეშფოთება გამოხატეს.

ევროკავშირი მუშაობს, იმისთვის, რომ პუტინმა უკრაინაში შეჭრისთვის და უკრაინის ოთხ რეგიონში ყალბი რეფერენდუმისთვის პასუხი აგოს.

რუსეთიდან ნედლი ნავთობის იმპორტის აკრძალვა ძალაში დეკემბერში შევა, ქვანახშირის იმპორტი უკვე ეტაპობრივად შეწყდა და რუსეთიდან ევროპაში გაზის მიწოდება შეფერხდა - ჯერ პუტინის ენერგეტიკული თამაშებით, შემდეგ კი ჩრდილოეთის ნაკადი-ს მილსადენზე საბოტაჟით.

ევროპელი ლიდერებისთვის მთავარი  ამოცანა ზამთარში ენერგეტიკის დეფიციტის, ფასების ზრდისა და გათიშვის  რისკის თავიდან აცილებაა.

საკითხზე ევროპელმა დიპლომატებმა politico-სთან  ანონიმურობის გარანტიით განაცხადეს, რომ შეთანხმების პროექტი ევროკავშირის ლიდერებს შორის  9 სექტემბერს შეთანხმდა.