ევროკავშირის საგარეო საქმეთა მინისტრები მიიღებენ გადაწყვეტილებას რამდენიმე მეზობელი და პარტნიორი ქვეყნის, მათ შორის საქართველოს მიერ გაცემული კოვიდ-19-ის საწინააღმდეგო ვაქცინაციის სერტიფიკატის აღიარების შესახებ. ამის შესახებ ინფორმაციას რადიო თავისუფლება ავრცელებს. 

„მე მაქვს რამდენიმე კარგი ამბავი, რომელიც კორონავირუსის კრიზისის წინააღმდეგ ბრძოლას უკავშირდება. დღეს ჩვენ მივიღებთ გადაწყვეტილებას მოლდოვის, საქართველოს და სერბეთის მიერ გაცემული კორონავირუსის სერტიფიკატების ეკვივალენტურობის შესახებ, რაც ნიშნავს, რომ არა მხოლოდ ამ ქვეყნების მოქალაქეებისათვის იქნება იოლი ევროკავშირში მოგზაურობა, არამედ ევროკავშირის მოქალაქეებიც შეძლებენ მოგზაურობას ამ ქვეყნებში“, - განაცხადა ოლივერ ვარჰეიმ, სამეზობლო პოლიტიკისა და გაფართოების საკითხების ევროკომისარმა.

რადიო თავისუფლების ინფორმაციით, ევროკავშირის საგარეო საქმეთა მინისტრები აღნიშნულ გადაწყვეტილებას ხვალ მიიღებენ და ის დაუყოვნებლად შევა ძალაში.

ცნობილია, რომ ოქტომბრის დასაწყისში ევროკავშირის წევრმა ჩეხეთმა ინდივიდუალურად აღიარა საქართველოს მიერ გაცემული კოვიდ-19-ის საწინააღმდეგო ვაქცინაციის სერტიფიკატი.