გერმანიის ეკონომიკის მინისტრმა რობერტ ჰაბეკმა გერმანიის ტელევიზიაში გამოსვლისას თქვა, რომ ევროკავშირი უახლოეს დღეებში შეთანხმდება რუსეთიდან ნავთობის იმპორტის აკრძალვაზე.
ჰაბეკის თქმით, თავისთავად ემბარგო მოსკოვს ვერ დააკარგვინებს შემოსავლებს, ვინაიდან ექსპორტის მოცულობის დაკარგვის კომპენსირება ნავთობის მაღალი ფასებით მოხდება. ამასთან დაკავშირებით ევროპის კომისია და აშშ ერთობლივად მუშაობენ გეგმაზე, რომელიც ნავთობზე ფასების ლიმიტის შემოღებას ითვალისწინებს. გეგმის მიზანია, საკმარისი რაოდენობის ქვეყნები შეთანხმდნენ, რომ ნავთობში არ გადაიხადონ მათ მიერ დაწესებულ ზღვარზე უფრო მეტი ფასი.
ევროკომისიის ხელმძღვანელმა ურზულა ფონ დერ ლაიენმა განაცხადა, რომ ევროპის კავშირს არ შეუძლია რუსეთის ენერგომატარებლების იმპორტზე სრული და დაუყოვნებელი აკრძალვის შემოღება.
მისი სიტყვებით, თუკი ბრიუსელი დაუყოვნებლივ შემოიღებს ემბარგოს რუსეთის ნავთობზე, პრეზიდენტი ვლადიმირ პუტინი, „სავარაუდოდ, მოახერხებს, ის ნავთობი, რომელსაც ევროპაში ვერ გაყიდის, გადაისროლოს მსოფლიო ბაზრებზე, სადაც ფასები გაიზრდება და ამისთვის მეტ შემოსავალს მიიღებს“. „ეს შეავსებდა მის სამხედრო ხაზინას“, დასძინა მან. ფონ დერ ლაიენის აზრით, საჭიროა სტრატეგიული მიდგომა, რათა ზიანი არ მიადგეს ევროპის ეკონომიკას, „ვინაიდან ის ყველაზე მძლავრი ინსტრუმენტია რუსეთის აგრესიის საწინააღმდეგოდ,“ მიაჩნია ევროკომისიის პრეზიდენტს.
დასავლეთის ქვეყნებმა რუსულ ენერგომატარებლებზე უარის თქმა დაიწყეს მას შემდეგ, რაც რუსეთის არმია უკრაინაში შეიჭრა. ევროკავშირის სანქციების მეექვსე პაკეტი, რომელიც სხვათა შორის მოიცავს რუსეთის ნავთობის იმპორტზე აკრძალვას, დაბლოკა რამდენიმე ქვეყანამ, რომლებიც ძლიერ არიან დამოკიდებული რუსულ ნავთობზე. პირველ რიგში საქმე ეხება უნგრეთს. როგორც Reuters-ი შენიშნავს, ევროკომისია იმედოვნებს, რომ მათთვის მეტი კომპენსაციისა და ენერგეტიკაში ინვესტიციების შეთავაზების გზით დაარწმუნებს ამ ქვეყნებს.
radiotavisupleba.ge