აღმოსავლეთ ევროპის რამდენიმე ქვეყანამ უკრაინის საკვები პროდუქტების იმპორტის შეჩერება დაიწყო ცალმხრივი წესით, ამიტომ ევროკავშირმა გადაწყვიტა, ცენტრალიზებულად შემოიღოს შეზღუდვები უკრაინიდან რამდენიმე სახეობის სასოფლო-სამეურნეო პროდუქციის იმპორტზე. ინფორმაციას Reuters ავრცელებს.
ევროკომისია განიხილავს რამდენიმე კატეგორიის ხორბლეული და ზეთოვანი კულტურების, მათ შორის ხორბლის, სიმინდის, მზესუმზირასა და რაფსის აკრძალვას.
ევროკავშირის სავაჭრო წესები ევროკომისიას უფლებას აძლევს, აკრძალოს გარკვეული საქონლის იმპორტი კავშირის მასშტაბით ან მის ნაწილში, ტრანზიტის აუკრძალავად.
დღეს ევროკომისიის პრეზიდენტმა ურზულა ფონ დერ ლაიენმა ბულგარეთის, უნგრეთის, პოლონეთის, რუმინეთისა და სლოვაკეთის ლიდერებს გაუგზავნა წერილი, რომელშიც დახმარებას დაჰპირდა მათ. გასულ თვეში კი ევროკომისიამ უკვე გამოუყო პოლონეთს, რუმინეთსა და ბულგარეთს 56 მილიონი ევრო.