ევროკავშირის საგარეო საქმეთა მინისტრები ავღანეთში შექმნილ ვითარებას 17 აგვისტოს განიხილავენ. ამის შესახებ საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჟოზეფ ბორელმა განაცხადა.
„ავღანეთში განვითარებული ბოლო მოვლენებისა და გასულ დღეებსა და საათებში პარტნიორებთან ინტენსიური კონტაქტების შემდეგ, გადაწყვეტილება მივიღე, ხვალ ევროკავშირის საგარეო საქმეთა მინისტრების რიგგარეშე ვიდეოკონფერენცია გავმართო სიტუაციის შესაფასებლად. ავღანეთი გზაჯვარედინზე დგას. საფრთხე ემუქრება მისი მოქალაქეების უსაფრთხოებასა და კეთილდღეობას, ასევე საერთაშორისო უსაფრთხოებას“, - აღნიშნა ჟოზეფ ბორელმა.
15 აგვისტოს „თალიბანის“ წევრები ქაბულში შევიდნენ. ამის შემდეგ აშშ-ის საელჩოდან დიპლომატების ევაკუაცია ვერტმფრენით განხორციელდა. ავღანეთის პრეზიდენტი აშრაფ ღანი ტაჯიკეთში გაიქცა.
ავღანეთის 34 პროვინციის ადმინისტრაციული ცენტრებიდან 27 უკვე „თალიბების“ ხელშია. ქაბულამდე, დაჯგუფებამ ნანგარჰარის პროვინციის დედაქალაქი, ჯალალაბადი აიღო და როგორც მედია წერს, დაჯგუფებას ამ ქალაქზე კონტროლის დასამყარებლად, ბრძოლაც კი არ დასჭირვებია.
ამერიკის პრეზიდენტის, ჯო ბაიდენის გადაწყვეტილებით, ავღანეთში, დამატებით, 1 000 სამხედრო გაიგზავნება.
1-ელ მაისს შეერთებულმა შტატებმა ავღანეთიდან ჯარის გაყვანა ოფიციალურად დაიწყო. 14 აპრილს აშშ-ის პრეზიდენტმა, ჯო ბაიდენმა ავღანეთიდან ამერიკული ჯარების გამოყვანა გამოაცხადა.
ავღანეთის პრეზიდენტმა, აშრაფ ღანიმ ქვეყანაში უსაფრთხოების მკვეთრად გაუარესებული მდგომარეობა აშშ-ის მიერ ჯარების გაყვანის მოულოდნელ გადაწყვეტილებას დაუკავშირა.
imedinews.ge