ევროპარლამენტმა მიიღო რეზოლუცია, რომელიც ევროკავშირის 27 წევრ ქვეყანას მოუწოდებს, გერმანიის ყოფილ კანცლერ გერჰარდ შრედერს (1998-2005) სანქციები დაუწესონ. ამის მიზეზი უკრაინის წინააღმდეგ რუსეთის აგრესიის მიუხედავად, კრემლის რეჟიმთან მისი თანამშრომლობაა. ინფორმაციას უკრაინული „ნოვოე ვრემია“ ავრცელებს.
რეზოლუციის თანახმად, ევროპული სანქციები უნდა გავრცელდეს არა მხოლოდ რუს ოლიგარქებზე, არამედ მსხვილი რუსული კომპანიების გამგეობის უცხოელ წევრებსა და „პოლიტიკოსებზე, რომლებიც რუსეთის ფედერაციისგან ფულს ისევ იღებენ.“
უკრაინის ომის დაწყებიდან შრედერს რუსული სახელმწიფო კომპანიების, „როსნეფტისა“ და „გაზპრომის“ ხელმძღვანელობის დატოვება მოსთხოვეს. სხვა საკითხებთან ერთად, ყოფილი კანცლერის მიმართ პრეტენზიები უკავშირდება იმასაც, რომ მას ეს თანამდებობები შესაძლოა, მთავრობის მეთაურად მუშაობის დროს კრემლისადმი ლოიალობისა და „გაზპრომის“ ინტერესების ლობირებისთვის მიეღო.
ამასთან, Reuters-ის ცნობით, გერმანიის სახელმწიფო ბიუჯეტიდან დაფინანსებული გერჰარდ შრედერის ოფისი დაიხურება, ხოლო მის თანამშრომლებს ახალი თანამდებობები გადაეცემათ. მართალია, გერმანიის ყოფილი ლიდერები, როგორც წესი, ოფისს საჯარო დაფინანსებით იღებენ, თუმცა კანცლერ ოლაფ შოლცის სამპარტიანი მმართველი კოალიცია შრედერის ოფისის დახურვაზე პარლამენტის წინადადებას დაეთანხმა. გადაწყვეტილება მას შემდეგ მიიღეს, რაც შრედერმა უარი თქვა პუტინის დაგმობაზე და მას კვლავ ახლო მეგობარს უწოდებს.
გერმანიის ფინანსთა მინისტრ კრისტიან ლინდნერის შეფასებით, წარმოუდგენელია, რომ „ყოფილი კანცლერი, რომელიც ღიად ლობირებს პუტინის კრიმინალურ მმართველობას, სამუშაოს კვლავ გერმანელი გადასახადების გადამხდელებისგან იღებდეს.“
Spiegel-ის მონაცემებით, რუსეთის სახელმწიფო ენერგეტიკულ კომპანიებში 78 წლის შრედერი გაცილებით მეტს შოულობს იმ 400 000 ევროზე, რასაც გერმანიის სახელმწიფო მის ოფისზე ხარჯავს. გამოცემა აკონკრეტებს, რომ გასულ წელს ყოფილი კანცლერის ოფისის პერსონალისა და მათი მგზავრობის ხარჯმა, თითქმის, 419 ათასი ევრო შეადგინა, რაშიც საოფისე ფართისა და მისი აღჭურვილობის ხარჯები გათვალისწინებული არ არის.
„საბიუჯეტო კომიტეტი აღნიშნავს, რომ ყოფილი კანცლერი, შრედერი აღარ ასრულებს არანაირ დაკისრებულ მოვალეობას, რაც ყოფილ თანამდებობაზე მუშაობიდან გამომიდანრეობს, ამიტომ ოფისი დაიხურება,“ - ნათქვამია ორივე მხარის ერთობლივ განცხადებაში.
Spiegel-ის ცნობით, ასევე, იგეგმებოდა შრედერისთვის თვეში 7000 ევროს ოდენობის პენსიის შეწყვეტაც, თუმცა მას ეს პენსია უნარჩუნდება.
უკრაინის ომის მიმართ შრედერის დამოკიდებულებით მისი ოფისის თანამშრომლებიც კი იმედგაცრუებული დარჩნენ. ოფისის ოთხმა წევრმა ომის დაწყებისთანავე ახალი თანამდებობა ითხოვა.
დარჩენილ პერსონალს ოფისის დახურვის შესახებ დეტალურად აცნობებენ, ხოლო ფაილები სახელმწიფო არქივს გადაეცემა.