ევროკავშირი სანქციების ახალ პაკეტში ოთხი რუსული ბანკის, მათ შორის Alfa-Bank-ის ჩართვას და რუსეთში რიგი საქონლის მიწოდების აკრძალვას აპირებს. ამის შესახებ Politico იუწყება
„ახალი ფინანსური სანქციები შეეხება ოთხ რუსულ ბანკს, მათ შორის რუსეთის უმსხვილეს Alfa-Bank-ს“, - წერს გამოცემა.
მთლიანობაში, სანქციების სიაში დაგეგმილია 130 ფიზიკური და იურიდიული პირის შეყვანა, მათ შორის არიან სამხედროები, სახელმწიფო მედიის ჟურნალისტები, ასევე კომპანიები და ფიზიკური პირები, რომლებიც დაკავშირებული არიან რუსეთის სამხედრო ინდუსტრიასთან ან ვაგნერის ჯგუფთან.
გარდა ამისა, ევროკავშირს რუსეთიდან რეზინისა და ბიტუმის იმპორტის აკრძალვა სურს. ასევე, განიხილება რუსეთის მოქალაქეების მუშაობის შეზღუდვა იმ კომპანიების საბჭოში, რომლებიც ისეთ კრიტიკულ ინფრასტრუქტურას ემსახურებიან, როგორიცაა ელექტროქსელები და გაზის მიმწოდებელი კომპანიები.
გარდა ამისა, ექსპორტის შეზღუდვებმა შეიძლება გავლენა იქონიოს ევროკავშირიდან რუსეთის ფედერაციაში სატვირთო და სამშენებლო სექტორში გამოყენებული სხვა მანქანების მიწოდებაზე. ასევე, ევროკავშირის ხელისუფლება გეგმავს დააწესოს დამატებითი აკრძალვა რუსეთში ელექტრონული კომპონენტების ექსპორტზე, რომლებიც შეიძლება გამოყენებულ იქნას იარაღის წარმოებაში. Politico-ს წყაროს თქმით, გაურკვეველია იმოქმედებს თუ არა ახალი სანქციების პაკეტი ბრილიანტებზე.
გარდა ამისა, ბრიუსელი გეგმავს დუბაიში დაფუძნებული იმ გადამზიდავი კომპანიის შავ სიაში შეყვანას, რომელიც არსებული სანქციების გვერდის ავლაშია ეჭვმიტანილი.
მანამდე ევროკავშირმა განაცხადა, რომ სანქციების მორიგი, მეათე პაკეტის შემოღება თებერვლის ბოლოდან იგეგმებოდა. ევროკომისიის ხელმძღვანელმა ურსულა ფონ დერ ლაიენმა განაცხადა, რომ გეგმის მიხედვით, სანქციების მეათე პაკეტი, სხვა საკითხებთან ერთად, უნდა მოიცავდეს აკრძალვებს იმ საქონლის მიწოდებაზე, რომლის ალტერნატივის პოვნა თითქმის შეუძლებელია. აქ იგულისხმება საქონელი, რომელიც ევროკავშირის თქმით, რუსეთის სამხედრო-სამრეწველო კომპლექსს სჭირდება.