ევროკავშირისკენ გზაზე, სტატუსის მიღების შემთხვევაში, რა საინვესტიციო მოლოდინი უნდა ჰქონდეს ქვეყანას და რომელი სექტორებში აქვს საქართველოს ინვესტიციების მიმართულებით ზრდის პერსპექტივა? — ამ თემებზე „კომერსანტი“ „ეკონომიკური ტრანსფორმაციის ცენტრის“ პრეზიდენტს, ეკონომისტს რამაზ გერლიანს ესაუბრა.
„თუ კანდიდატის სტატუსის მიმართულებით გადაიდგმება ნაბიჯები, სექტორალურად კიდევ უფრო გაიზრდება ისეთი მიმართულებები რომლებიც ახლაც აქტიურია, მაგალითად საბანკო სექტორი და ენერგეტიკის მიმართულება, მაგრამ ყველაზე მეტად ჩვენ უნდა ველოდოთ ზრდას უძრავი ქონების კუთხით. როგორი იყო ქვეყნის პოლიტიკა უცხოელების საკუთრებასთან დაკავშირებით, ამაზე კითხვარშიც იყო აქცენტები და ჩვენი შეცდომები ამ მიმართულებით აშკარაა, ამიტომ თუ ეს გამოსწორდება და აკრძალვები შემსუბუქდება, ეს იქნება სწორედ ის სექტორი, რომელიც სტატუსის მოპოვებასთან ერთად მნიშვნელოვნად გაიზრდება“, - ამბობს რამაზ გერლიანი.
რამაზ გერლიანის თქმით, „საცდელი ვადა“ რომელიც ახლა გვაქვს ინვესტიციების კუთხით ცვლილებებს არ გამოიწვევს და წლების განმავლობაში არსებული კლების ტენდენცია სავარაუდოდ შენარჩუნდება.
„თუ გადავხედავთ ბოლო წლებში ინვესტიციების შემოდინებას, აქ მუდმივად კლების ტენდენცია გვაქვს, მათ შორის პანდემიამდელ პერიოდში და ამას დამატებული ის რეკომენდაცია რაც ევროპარლამენტმა დააანონსა, ვერანაირად ვერ იქნება ზრდადი ტენდენციის წინაპირობა. პრაქტიკულად მოლოდინი გვქონდა უფრო მეტის და რეალურად კანდიდატის სტატუსი ვერ შედგა, მოგვცეს ე.წ. საცდელი ვადა. შესაბამისად დღეს საინვესტიციო გარემოსთვის დადებითი ვითარება არ არის, ამიტომ რაიმე განსაკუთრებულ ცვლილებას არ უნდა ველოდოთ. თუმცა ეს გზა გასავლელი იყო და ჯერ კიდევ გასავლელია, მაგრამ რომ ყოფილიყო უკვე კანდიდატის სტატუსი ეს აშკარა და მკაფიო გზავნილი იქნებოდა ინვესტორებისთვის, რომ ქვეყანას აქვს პროგრესი. დღეს არის რამოდენიმე შენიშვნა, ეს კი არის გზავნილი რომ ქვეყანაში საინვესტიციო გარემო სულ ჯანსაღი არ არის, იქ არის საუბარი დეოლიგარქიაზე სასამართლო სისტემის პრობლემებზე და ა.შ. რაც პირდაპირ კავშირშია საინვესტიციო გარემოსთან.
მაგალითად ბალტიისპირეთის ქვეყნებს წლები დასჭირდა ევროკავშირში გაწევრიანებისთვის, მაგრამ თითოეული ნაბიჯი რამდენითაც ისინი მიიწევდნენ წინ, მათი საინვესტიციო გარემო უმჯობესდებოდა და პირდაპირპროპორციულად აისახებოდა მათ ზრდაზე. როდესაც კანდიდატის სტატუს გაძლევენ ეს ნიშნავს ბევრი ტიპის გარემოს შეცვლას, მათ შორის იზრდება დაფინანსება და ეს ავტომატურად აუმჯობესებს ქვეყანაში არსებულ ვითარებას. ყველა ქვეყანა ვინც კი ეს გზა გაიარა, მათთან ეს პროგრესი ყველ ეტაპზე შესამჩნევი იყო“,- აღნიშნავს გერლიანი.
საბოლოო გადაწყვეტილება საქართველოსთვის ევროპული პერსპექტივის, (ხოლო უკრაინისია და მოლდოვისთვის - პექსპექტივასთან ერთად, კანდიდატის სტატუსის) მინიჭებაზე უნდა მიიღოს ევროპულმა საბჭომ, რომელიც აერთიანებს ევროკავშირის 27-ვე წევრი ქვეყნის ლიდერს. მათი შეხვედრა 23-24 ივნისს, ბრიუსელში გაიმართება.
ნინო თამაზაშვილი