ევროსტატის მიერ გამოქვეყნებული თავშესაფრის მაძიებელთა შესახებ ყოველთვიური მონაცემების მიხედვით, 2022 წლის ივლისში ევროკავშირის წევრ ქვეყნებში თავშესაფარი პირველად ევროკავშირის არაწევრი ქვეყნის 66 545 მოქალაქემ მოითხოვა, რაც 0.4%-ით მეტია წინა თვის მონაცემზე. 2021 წლის ივლისთან შედარებით კი თავშესაფრის მაძიებელთა მოთხოვნების საერთო რაოდენობა 49%-ითაა გაზრდილი.
2022 წლის ივლისში თავშესაფრის ხელმეორედ მაძიებელთა რიცხვი წინა თვესთან შედარებით 7%-ით შემცირდა და გასული წლის მონაცემებთან შედარებით 2%-ით გაიზარდა.
ევროსტატის მონაცემებით, თავშესაფრის მსურველთა უმეტესობა სირიელი იყო. სირიელების შემდეგ არიან ავღანეთის, ვენესუელას, პაკისტანის და კოლუმბიის მოქალაქეები. თავშესაფრის მაძიებელთა შორის არიან ასევე უკრაინელები. თუმცა, მათი რიცხვი 2022 წლის მარტის შემდეგ ყოველთვიურად იკლებს.
თავშესაფრის მაძიებელთა ყველაზე დიდი ნაკადი გერმანიას მიაწყდა. 2022 წლის ივლისის მონაცემებით გერმანიაში თავშესაფარი დევნილთა 21%-მა მოითხოვა. გერმანიას მოსდევს საფრანგეთი, ავსტრია, ესპანეთი და იტალია.
2022 წლის ივლისში ევროკავშირის წევრ ქვეყნებში თავშესაფარი პირველად 3 400-მა უპატრონო არასრულწლოვანმა მოითხოვა. მათი უმრავლესობა ავღანეთიდან, სირიიდან, სომალიდან და პაკისტანიდან იყო. ევროსტატის მონაცემებით არასრულწლოვანთა უმრავლესობამ თავშესაფრისთვის ევროპის სამ ქვეყანას - ავსტრიას, გერმანიას და ნიდერლანდებს მიმართა.