ევროკავშირმა სანქციები დაუწესა ირანის ინფორმაციის მინისტრს, ქვეყნის მორალის პოლიციას და სხვა მაღალჩინოსნებს, დაპატიმრებული ახალგაზრდა ქალის, მაჰსა ამინის სიკვდილისა და მთელი ქვეყნის მასშტაბით მიმდინარე საპროტესტო აქციებზე სასტიკი ზეწოლის გამო.
ბლოკმა თავის ოფიციალურ გამოცემაში 17 ოქტომბერს გამოაქვეყნა სანქციების სიაში შეყვანილთა ვინაობა. მათ შორისაა 11 პირი და ოთხი უწყება. სიაში მოხვდნენ ე.წ. მორალის პოლიციის მაღალჩინოსნები, ისლამური რევოლუციის გუშაგთა კორპუსის სამხედრო ფრთა ბასიჯი და ეროვნული პოლიციის დანაყოფი.
თეირანმა 17 ოქტომბერს განაცხადა, რომ ამ სანქციებს დაუყოვნებლივ უპასუხებს.
მაჰსა ამინი 16 სექტემბერს გარდაიცვალა, სამ დღეში მას შემდეგ, რაც თვითმხილველებმა ნახეს, როგორ მიჰყავდა ის მორალის პოლიციას ჰიჯაბის ტარების წესების დარღვევის გამო. მოწმეები ამბობენ, რომ ხედავდნენ, როგორც სცემდნენ ქალს პოლიციელები. ოფიციალური სამედიცინო ანგარიშის თანახმად, ამინის სიკვდილი გამოიწვია ავადმყოფობამ, თუმცა ქალის ოჯახის წევრები ამბობენ, რომ იგი სრულიად ჯანმრთელი იყო.
ამინის სიკვდილის შემდეგ ირანელები მთელი ქვეყნის მასშტაბით აწყობენ საპროტესტო აქციებს, მიუხედავად ხელისუფლების გაფრთხილებისა, რომ დემონსტრანტების მიმართ რეპრესიები მკაცრი იქნება.