ევროკავშირის კანონმდებლები და წევრი ქვეყნები მობილური ტელეფონების, პლანშეტებისა და ყურსასმენების დამტენის საერთო პორტზე შეთანხმებას წლის ბოლომდე მიაღწევენ. ამის შესახებ ინიციატივის ხელმძღვანელმა ევროპარლამენტში, დეპუტატმა, ალექს აგიუს სალიბამ განაცხადა, რასაც Reuters ავრცელებს.
ის იმედოვნებს, რომ საკანონმდებლო ასამბლეა შეძლებს, მის წინადადებას მაისში უყაროს კენჭი, რაც დეპუტატს საშუალებას მისცემს, ევროკავშირის ქვეყნებთან საბოლოო პროექტზე მოლაპარაკებები დაიწყოს.
„ჩვენი ამბიციაა, რომ წლის ბოლომდე შეთანხმება შევძლოთ. თუმცა თუ მხოლოდ სმარტფონებზე გავამახვილებთ ყურადღებას, ეს ხელიდან სრულად გაშვებული შესაძლებლობა იქნება,” - განუცხადა Reuters-ს ალექს აგიუს სალიბამ.
მას სურს, რომ მობილური დატენვის საერთო პორტი ელექტრონულ წამკითხველებს, დაბალი სიმძლავრის ლეპტოპებს, კლავიატურებს, კომპიუტერის მაუსებს, ყურსასმენებს, ჭკვიან საათებსა და ელექტრონულ სათამაშოებსაც ჰქონდეს. თუმცა კომისიის სიაში მხოლოდ მობილური ტელეფონები, პლანშეტები და ყურსასმენები შედის.
აგიუს სალიბას, ასევე, სურს, რომ კომისიამ 2025 წლისთვის უსადენო დატენვის სისტემების ჰარმონიზაციაც მოახდინოს, ხოლო კომპანიების მიერ მოწყობილობების ადაპტირებისთვის, კანონი ძალაში ორი წლის ნაცვლად, მიღებიდან ექვსი თვის შემდეგ შევიდეს.
დეპუტატის წინადადებები კომისიის პროექტზე უფრო ფართო მასშტაბსა და მოკლე ვადებს გულისხმობს, რაც, სავარაუდოდ, გავლენას მოახდენს Samsung-ზე, Huawei-სა და მოწყობილობების სხვა მწარმოებლებზე. აგიუს სალიბას ინიციატივა უკვე მკაცრად გააკრიტიკა iPhone-ის მწარმოებელმა, Apple-მა. კომპანიამ ევროკავშირი გააფრთხილა, რომ საერთო დამტენების ინიციატივა ინოვაციებს დააზარალებს და თუ მომხმარებლები აიძულეს, ახალ დამტენებზე გადავიდნენ, ეს ელექტრონული ნარჩენების მთას წარმოქმნის.
ევროკომისია მობილური მოწყობილობების დატენვის საერთო პორტის ინიციატივით პირველად ათ წელზე მეტი ხნის წინ გამოვიდა, თუმცა მან კანონპროექტის სახე მხოლოდ გასულ წელს მიიღო, რადგან თავად კომპანიები საკითხზე ვერ შეთახნმდნენ.
IPhone-ისა და Android-ის მომხმარებლები დიდი ხანია ჩივიან, რომ ტელეფონებისთვის სხვადასხვა დამტენის გამოყენება უწევთ. Iphone ე.წ. Lightning კაბელით, ხოლო Android-ის მოწყობილობები USB-C კონექტორების გამოყენებით იმუხტება.
2019 წელს კომისიის მიერ ჩატარებული კვლევის მიხედვით, 2018 წელს გაყიდული მობილური ტელეფონების დამტენების ნახევარს USB micro-B, 29%-ს - USB-C, ხოლო 21%-ს Lightning-ის კონექტორი ჰქონდა.
bpn.ge
მობილური მოწყობილობები
