ევროკავშირმა ილონ მასკის SpaceX-თან შესაძლოა, ერთობლივი ფონდის შექმნაზე კონტრაქტი გააფორმოს, რითიც კორპორაციის მიერ უკრაინისთვის გადაცემული Starlink-ის ტერმინალების საფასურს გადაიხდის. ამის შესახებ Financial Times (FT) კორპორაციის სამ თანამშრომელზე დაყრდნობით წერს, ვინც უკრაინის ინტერნეტ კომუნიკაციებით უზრუნველყოფის ვარიანტებზე მონაცემებს ფლობს.

ბლოკის საგარეო უწყების ხელმძღვანელმა, ჟოსეპ ბორელმა დიპლომატებს დაავალა, შეიმუშავონ გეგმა უკრაინაში ინტერნეტ-კომუნიკაციების დასაცავად. მან ეს მითითება მას შემდეგ გასცა, რაც ამერიკელი მილიარდერი კიევისთვის შეწირული Starlink-ის სატელიტური კავშირის ტერმინალების დაფინანსების შეწყვეტით დაიმუქრა, რაც მან მოგვიანებით გადათქვა.

FT-ის ცნობით, ფონდის შექმნის მომხრეები აღნიშნავენ, რომ კონტრაქტი მათ საშუალებას მისცემს, მასკს სასამართლოში უჩივლონ, თუ ის მომსახურებას შეაჩერებს, რაც მხოლოდ მის პირად გადაწყვეტილებაზე აღარ იქნება დამოკიდებული. გამოცემა წერს, რომ ევროკავშირის ოფიციალური პირები ილონ მასკის დაპირებებს არ ენდობიან და ზოგიერთმა ქვეყანამ სერვისის დასაფინანსებლად ფულის გამოყოფის საკითხი საგარეო საქმეთა მინისტრების 17 ოქტომბრის ლუქსემბურგის შეხვედრაზეც კი დასვა.

მანამდე ოფიციალურმა კიევმა გაავრცელა ინფორმაცია, რომ Starlink-ის მოწყობილობები ბოლო კვირებში მასიურად ითიშებოდა. ამასთან, Financial Times-იც იტყობინებოდა, რომ Starlink-ის ზოგიერთმა ტერმინალმა მუშაობა იმ ადგილებში შეწყვიტა, სადაც უკრაინელებმა კონტროლი აღადგინეს.

ამერიკელი მილიარდერი უკრაინისთვის სატელიტური კავშირის ტერმინალების მომსახურების გამო SpaceX-ის ხარჯებს თვეში 20 მლნ დოლარად აფასებს. ზოგიერთი ტერმინალი SpaceX-მა უკრაინას უსასყიდლოდ გადასცა, თუმცა ბევრ მათგანს აშშ-ის ხელისუფლება აფინანსებს. თავად მასკმა 17 ოქტომბერს Twitter-ზე დაწერა, რომ უკრაინაში 25 300 ტერმინალი იქნა დამონტაჟებული, რომელთაგან 10 630 ერთეულის ფულს უხდიან.

გასული კვირის ბოლოს CNN-მა გაარკვია, რომ SpaceX-მა აშშ-ის თავდაცვის დეპარტამენტს მიმართა თხოვნით, რომ უკრაინისთვის Starlink-ის თანამგზავრული ქსელი მთლიანად დაეფინანსებინა. ოქტომბრის დასაწყისში მილიარდერმა Twitter-ზე დაწერა, რომ უკრაინაში Starlink-ის მუშაობა SpaceX-ს უკვე 80 მლნ დოლარი დაუჯდა, რაც წლის ბოლოსთვის 100 მლნ დოლარს გადააჭარბებს. თუმცა გუშინ მასკმა განაცხადა, რომ SpaceX-მა პენტაგონიდან „დაფინანსების მოთხოვნა უკან გაიწვია.“

მილარდერის შეფასებით, რუსეთი აქტიურად ცდილობს, უკრაინაში Starlink-ის სატელიტური ინტერნეტ-სერვისი „მოკლას.“ მასკის ცნობით, ამჟამად Starlink ფრონტზე ერთადერთი მოქმედი საკომუნიკაციო სისტემაა, რომელსაც უკრაინელი სამხედროები იყენებენ.

წყარო: bpn.ge