მომავალი წლის 1-ლი მარტიდან ევროკავშირის ქვეყნებში მხოლოდ ვაქცინირებული ტურისტები შეძლებენ შესვლას. ევროკომისიის ეს ინიციატივა ოფიციალურ ვებგვერდზე არის წარმოდგენილი.
„მსოფლიო მასშტაბით ვაქცინაციის კამპანიებში მოსალოდნელი პროგრესის გათვალისწინებით, ევროკომისია 2022 წლის 1-ლი მარტიდან გამარტივებულ მიდგომას გთავაზობთ, რაც მთლიანად იქნება დამოკიდებული მოგზაურის სტატუსზე და არა გამგზავრების ქვეყანაზე: წევრმა სახელმწიფოებმა თავიანთ ტერიტორიაზე მხოლოდ ვაქცინირებული, გამოჯანმრთელებული ან აუცილებელი მგზავრობის პირის შესვლა უნდა დაუშვან,“ - ნათქვამია ევროკომისიის განცხადებაში.
მოგზაურობისთვის საკმარისად კარგ ეპიდემიოლოგიურ სიტუაციაში მყოფი მესამე ქვეყნების სიას, რომელსაც ე.წ. მწვანე სიას უწოდებენ, ევროკომისია აუქმებს.
„სიის ხშირი განახლება ადამიანებს მოგზაურობის დაგეგმვას ურთულებს. ახალი წესები სისტემას უფრო გასაგებს გახდის და მოგზაურებისთვის უფრო მეტ სიცხადეს შეიტანს მათ გეგმებში,“ - ნათქვამია განცხადებაში.
ამდენად, მომავალი წლის 1-ლი მარტიდან ევროკავშირში მოგზაირობაზე შეზღუდვა მოგზაურის ქვეყნიდან გამომდინარე კი არა, პიროვნების სტატუსის მიხედვით განისაზღვრება. ამ პერიოდს ევროკომისია წინასწარ იმიტომ იღებს, რომ ევროკავშირის არაწევრ ქვეყნებს ვაქცინაციის მაჩვენებლების შემდგომი ზრდისთვის დრო მიეცეთ.
ევროკავშირი სრულად ვაქცინირებულ პირს ვაქცინირებულად მეორე აცრიდან ცხრა თვის განმავლობაში აღიარებს, ხოლო ამ პერიოდის შეემდეგ ბუსტერდოზით ანუ გამაძლიერებელი მესამე ვაქცინით აცრა გახდება საჭირო.
ევროპის წამლის სააგენტოს (EMA) მიერ დამტკიცებული ვაქცინით აცრილ მოქალაქეებს რაიმე დამატებითი დოკუმენტი აღარ დასჭირდებათ, ხოლო ვინც მხოლოდ ჯანდაცვის მსოფლიო ორგანიზაციის მიერ აღიარებული ვაქცინით არის აცრილი, რომელიც EMA-ს მიერ არ არის დამტკიცებული, მან უარყოფითი PCR ტესტის საბუთიც უნდა იქონიოს.
შეზღუდვები 6 წლამდე ასაკის ბავშვებზე არ ვრცელდება, ხოლო 6-დან 17 წლამდე ასაკის ბავშვებისთვის მხოლოდ PCR ტესტის ჩატარება იქნება საკმარისი.
ამჟამად ევროკავშირის „მწვანე სიაში“ არგენტინა, ავსტრალია, ბაჰრეინი, კანადა, ჩილე, კოლუმბია, ინდონეზია, იორდანია, კუვეიტი, ნამიბია, ახალი ზელანდია, პერუ, კატარი, რუანდა, საუდის არაბეთი, სამხრეთ კორეა, არაბთა გაერთიანებული საემიროები, ურუგვაი და ჩინეთი შედის.
bpn.ge