„ევროკავშირში  არსებობს პოლიტიკური გადაწყვეტილება, რომ საქართველო, უკრაინა და მოლდოვა, ადრე თუ გვიან, გახდებიან მისი წევრები“,  - ამის შესახებ რადიო „კომერსანტის“ ეთერში, გიორგი აბაშიშვილის საავტორო გადაცემაში “ბიზნესინსაიდერი“, ევროპულ-ქართული ინსტიტუტის ხელმძღვანელმა გიორგი მელაშვილმა განაცხადა. მისივე თქმით, დანარჩენი  უკვე საქართველოზე და იმაზეა დამოკიდებული, თუ რამდენად ვიმუშავებთ  ევროკავშირის ყველა ქვეყანასთან და დავანახებთ მათ, რომ ჩვენ არამხოლოდ მზად ვართ წევრობისთვის, არამედ ამ ეკონომიკური და პოლიტიკური ალიანსისთვის საქართველოს სიკეთის მოტანაც შეუძლია.

გიორგი მელაშვილმა ევროკავშირის წევრობასთან დაკავშირებით მის მოლოდინებზეც ისაუბრა და აღნიშნა, რომ კანდიდატის  სტატუსი, თუ რამე კატასტროფა არ მოხდა, სამივე  ასოცირებულმა  ქვეყანამ უნდა მიიღოს. რაც  შეეხება შემდგომ ეტაპებს, მელაშვილმა აღნიშნა, რომ  დამოკიდებულია რეფორმირების უნარზე, თუ რამდენად მოახერხებს  საქართველოს რეფორმების  გატარებას და მეორეს მხრივ რამდენად დაარწმუნებს ყოყმანის რეჟიმში მყოფ  ქვეყნებს.

„ევროკავშირის  შიგნით ბევრი  ძალის  ცენტრი არის, გაფართოების მორიგ ტალღას ლიბერალური ფლანგი მხარს უჭერს, ქრისტიან-დემოკრატიული პარტიები ნაკლებად ოპტიმისტურად არიან განწყობილები, ულტრა მემარჯვენე და  ულტრა მემარცხენე  პარტიებს  რა  უნდათ – ცოტა გაუგებარია, მაგრამ ისინი  უფრო  ნეგატიურად  არიან  განწყობილები. მაგრამ  ჩვენ უნდა გავაგრძელოთ მუშაობა.

ქრისტიან–დემოკრატების  ფლანგში იგულისხმება ევროპის  სახალხო  პარტია, ევროპის  ყველაზე დიდი  პარტია, რომელიც წლების განმავლობაში განსაზღვრავდა  ევროპის  პოლიტიკას, თუმცა  ჩვენ  ვხედავთ  გერმანიაში, რომ  ისინი  არიან ოპოზიციაში, მთელ რიგ  სხვა  ქვეყნებშიც მათი მდგომარეობა  ცოტა  პრობლემურია, მაგრამ მიუხედავად  ამისა, ევროპარლამენტში ისინი ინარჩუნებენ  გავლენას,  ისინი  დღემდე  არიან ყველაზე  გავლენიანი,  წამყვანი და  მონოლითური ძალა და  მათ  ძალიან ბევრი  რაღაცის  გადაწყვეტა  შეუძლიათ“, -  აღნიშნა გიორგი მელაშვილმა.

თაკო კვაჭანტირაძე