ევროპელი კანონმდებლები ცოცხალი ცხოველების ტრანსპორტირების რეგულირების რეფორმაზე მუშაობენ. ინიციატივის მიზანია ცხოველთა კეთილდღეობის გაუმჯობესება მათი ტრანსპორტირების დროს. როგორც actu-transport-logistique.fr წერს, ამ სექტორში ნებისმიერ აკრძალვას ხუთი ქვეყანა ეწინააღმდეგება.

გამოცემა აღნიშნავს, რომ ევროკომისია (EC) ამჟამად ევროკავშირიდან მესამე ქვეყნებში ცოცხალი ცხოველების ტრანსპორტირების წესების შეცვლაზე აქტიურად მუშაობს. რეფორმის განხორციელება 2023 წლის მესამე კვარტლიდან იგეგმება, საკითხზე დებატებისას განსაკუთრებული ყურადღება ექცევა იმას თუ რამდენად სტრესულია ცხოველებისთვის ტრანსპორტირება.

ამ თემაზე ევროკავშირის წევრი ქვეყნების აზრი ორად არის გაყოფილი. ხუთი სახელმწიფო მზად არის ცოცხალი ცხოველების ტრანსპორტირება მესამე ქვეყნებში აიკრძალოს, მათ შორისაა გერმანია, ბელგია, დანია, შვედეთი და ნიდერლანდები. ეს ქვეყნები ცხოველთა საქალაქთაშორისო ტრანსპორტირების მიმართ მტრულად არიან განწყობილნი და სურთ რვა საათამდე შეზღუდონ მსხვილფეხა რქოსანი პირუტყვის სასაკლაომდე ტრანსპორტირების დრო. მეტიც, გერმანიამ და ლუქსემბურგმა მათ ტერიტორიაზე გაზრდილი ცოცხალი ცხოველების მესამე ქვეყნებში ექსპორტიც კი აკრძალეს. გამოკითხვების თანახმად, ევროპის მოქალაქეების უმრავლესობა წინააღმდეგია ასეთი ტრანსპორტირების.

„ყოველწლიურად მილიონობით ფერმის ცხოველს უწევს ასობით და ათასობით მილის გავლა, ხშირად ექსტრემალურ ტემპერატურაზე და საკმარისი წყლის, საკვებისა და შესვენების გარეშე“, - აცხადებს ცხოველთა დაცვის ორგანიზაციის Compassion in World Farming EU დირექტორი ოლგა კიკოუ.

თავის მხრივ, საფრანგეთი, პორტუგალია, საბერძნეთი, ირლანდია, ლატვია, ლიეტუვა, რუმინეთი და ესპანეთი ამ სექტორში ნებისმიერ გადაჭარბებულ აკრძალვას ეწინააღმდეგებიან. ამ ქვეყნების მიერ მომზადებულ ერთობლივ დოკუმენტში ნათქვამია, რომ „ცხოველთა ტრანსპორტირება არის საფუძველი სასოფლო-სამეურნეო ბაზრების ნორმალური ფუნქციონირებისთვის“.
მათი აზრით, ევროკავშირმა მიზნად უნდა დაისახოს ცხოველების ტრანსპორტირების პირობების გაუმჯობესება და არა მათი აკრძალვა. დოკუმენტში ასევე ნათქვამია, რომ „სასურველია ხორცის ან გენეტიკური მასალის ტრანსპორტირება, ვიდრე ცოცხალი ცხოველების შეძლებისდაგვარად. მაგრამ ეს შესაძლებლობები შეზღუდულია, მაგალითად, მრავალ განვითარებად ქვეყანაში ცივი ჯაჭვების არარსებობით.

გამოცემა აღნიშნავს, რომ სახელმწიფოებს, რომლებიც ეწინააღმდეგებიან ექსპორტის აკრძალვას, შეუძლიათ დაბლოკონ ნებისმიერი რეფორმა, რადგან ისინი წარმოადგენენ ევროკავშირის მოსახლეობის 35%-ზე მეტს. საბჭოში კვალიფიციური უმრავლესობის მისაღწევად საჭიროა ევროკავშირის წევრი ქვეყნების 65%-ის მხარდაჭერა.