ევროკომისია თამბაქოს ინდუსტრიის გადასახადის გადახედვის წინადადებით გამოდის:  აქციზის გაზრდას სიგარეტზე და გადასახადების დაწესებას ახალ პროდუქტებზე, როგორიცაა ვაიპები და ელექტროსიგარეტები.

ამის შესახებ Financial Times-ი ევროკომისიის დოკუმენტის პროექტზე დაყრდნობით იტყობინება.

გამოცემის ცნობით, ევროკავშირში სიგარეტზე მინიმალური აქციზის გადასახადი შეიძლება გაორმაგდეს 1,8-დან 3,6 ევრომდე კოლოფ 20 ღერ სიგარეტზე. ეს გამოიწვევს სიგარეტის ფასების ზრდას აღმოსავლეთ ევროპის ქვეყნებში, სადაც კოლოფი 3 ევროზე ნაკლები ღირს, აღნიშნავს გამოცემა.

დოკუმენტის პროექტში ნათქვამია, რომ მინიმალური აქციზის გაზრდა „ძლიერ გავლენას მოახდენს მომხმარებლებზე და ეკონომიკურ ოპერატორებზე“ სიგარეტის დაბალი ფასების მქონე ქვეყნებში, მათ შორის ბულგარეთში, სლოვაკეთში, პოლონეთსა და უნგრეთში. გარდა ამისა, სიგარეტზე აქციზი მნიშვნელოვნად გაიზრდება ისეთ ქვეყნებში, როგორიცაა ავსტრია და ლუქსემბურგი, სადაც თამბაქოს ფასები დაბალია შინამეურნეობების შემოსავლებთან შედარებით.

ევროკომისია ელოდება, რომ სიგარეტზე გადასახადების ზრდა ევროკავშირის წევრ ქვეყნებს დამატებით 9,3 მილიარდ ევროს მოუტანს.