ევროკავშირის ქვეყნებში უვიზო მიმოსვლის ამოქმედებიდან 5 წელი გავიდა. პრემიერ ღარიბაშვილის განცხადებით, ამ ხნის განმავლობაში საქართველოს 500 000-ზე მეტმა მოქალაქემ ევროპაში 1.5 მლნ-ზე მეტი ვიზიტი განახორციელა.
2014 წლის 27 ივნისს საქართველოსა და ევროკავშირს შორის ასოცირების ხელშეკრულება ამოქმედდა, რაც პროდუქციის ორმხრივად იმპორტის გადასახადისგან გათავისუფლებას გულისხმობდა.
2017 წლის 28 მარტიდან საქართველოს მოქალაქეებს ევროკავშირის შენგენის ზონის წევრ 22 ქვეყანაში: ავსტრია, ბელგია, გერმანია, დანია, ესპანეთი, ესტონეთი, იტალია, ლატვია, ლიტვა, ლუქსემბურგი, მალტა, ნიდერლანდები, პოლონეთი, პორტუგალია, საბერძნეთი, საფრანგეთი, სლოვენია, სლოვაკეთი, უნგრეთი, ფინეთი, შვედეთი, ჩეხეთი. ასევე შენგენის ზონის 4 კანდიდატ ქვეყანაში: ბულგარეთი, კვიპროსი, რუმინეთი, ხორვატია და ევროკავშირის არაწევრ 4 ქვეყანაში: ისლანდია, ლიხტენშტეინი, ნორვეგია და შვეიცარია უვიზოდ მიმოსვლის საშუალება მიეცათ.
საქართველოს მოქალაქეებს მასპინძელ ქვეყნებში 180 დღიან ვადაში მაქსიმუმ 90 დღით დარჩენა შეუძლიათ. უვიზო მიმოსვლა დასაქმებას არ ითვალისწინებს. საზღვრის კვეთის გამარტივების მიუხედავად გარკვეული მოთხოვნები მაინც სავალდებულო დარჩა, კერძოდ: უკან დასაბრუნებელი ბილეთი, სასტუმროს ჯავშანი და დღიურად 50-90 ევროს ფლობა ისევ სავალდებულოა. თავშესაფრის მოთხოვნის გაზრდილი რაოდენობის გამო 2020 წლიდან ქართველ მესაზღვრეებს, მოქალაქის ევროპაში არგაშვების უფლება მიენიჭათ.