რას მისცემდა საქართველოს ეკონომიკას EU-ს კანდიდატის სტატუსი და რა ნაბიჯები უნდა გადადგას მთავრობასთან ერთად ბიზნესმა ამ გზაზე, ამის შესახებ „კომერსანტთან“ დისტრიბუტორთა ასოციაციის ხელმძღვანელმა ივა ჭყონიამ ისაუბრა.
მისი თქმით, ევროკომისიის დასკვნა მხოლოდ ხელისუფლების პასუხისმგებლობაა, რადგან ბიზნესი ევროპულ სტანდარტებს წლებია ასრულებს.
„ევროკავშირის მხრიდან ბიზნესის მიმართ უკვე 2015 წლიდან არსებობდა მოთხოვნები რომელიც შესასრულებელი იყო, მაგალითად DCFTA (ევროკავშირთან ღრმა და ყოვლისმომცველი თავისუფალი ვაჭრობის შესახებ ხელშეკურულება) რომელსაც ბიზნესი პირნათლად ასრულებს. ბიზნესი მაქსიმალურად არის ჩართული, რომ ევროპული მიმართულებით და სტანდარტიზაციისკენ გავიდეთ. ევროკომისიის დასკვნა მხოლოდ ხელისუფლების პასუხისმგებლობაა, რადგან ბიზნესი ევროპულ სტანდარტებს წლებია ასრულებს.
რა თქმა უნდა ჩვენს მომავალს ნებისმიერი ქართული ბიზნესი ვხედავთ სტაბილურობისკენ. სტაბილური ქვეყანა კი თავის მხრივ ნიშნავს სამართლიან სასამართლოს, რაც ყველაზე პრიორიტეტული არის ჩვენთვის და სტაბილურ გარემოს ინვესტორებისთვის, ყველაფერი ამის განმაპირობებელი არის ევროკავშირის წევრობა. არასტაბილური გარემო და ის დეპოლარიზაცია რაც ჩვენს ქვეყანაში ხდება, ძალიან ცუდია და ნეგატიურად აისახება ბიზნესზე“, — ამბობს ჭყონია.
ბიზნესისთვის EU-ს კანდიდატის სტატუსის მნიშვნელობაზე საუბრისას ივა ჭყონია ამბობს, რომ ეს კარს გაუხსნიდა ქართველ ბიზნესებს თავიანთი პროდუქცია ევროპულ დახლებზე მარტივად განათავსონ.
„ორნიშნა ეკონომიკური ზრდა გვაქვს, მაგრამ ეს ზრდა რის ხარჯზეა სხვა საკითხია. თუმცა დამერწმუნეთ, ორნიშნა ეკონომიკურ ზრდაზე მეტად საზრუნავია ორნიშნა ინფლაცია. ასე რომ, ერთია ციფრებში რა არის ეკონომიკური ზრდა და მეორეა მოსახლეობა როგორ გრძნობს ამას, მე ვფიქრობ მათთვის გაცილებით უფრო მტკივნეულია მაღალი ინფლაცია. ამიტომ არსებული 12 პუნქტის გარდა, ევროკავშირის სტატუსისკენ მიმავალ გზაზე, ქვეყანას ბევრი საკითხი აქვს მოსაგვარებელი.
პირველ რიგში ევროპა არის სტაბილურობა, განათლება, რაც უმნიშვნელოვანესია ჩვენთვის. ერთ-ერთი ყველაზე პრიორიტეტული კი ის არის, რომ კარი ეხსნებათ ქართველ ბიზნესმენებს, ქართველ ფერმერებს, რომ თავითანი პროდუქცია ევროპულ დახლებზე მარტივად განათავსონ, თუ რა თქმა უნდა, დააკმაყოფილებენ სტანდარტებს. ბიზნესის მხრიდან რაც გასაკეთებელია, მაქსიმალურად გაკეთებულია, ახლა ჯერი მთავრობაზეა“, — განაცხადა ივა ჭყონიამ.