ევროპარლამენტის წევრებს თანამდებობის დატოვების შემდეგ, ორი წლის განმავლობაში, შესაძლოა, ლობირება აეკრძალოთ. ინფორმაციას Politico ავრცელებს.
ევროპარლამენტის ლობირებისა და გამჭვირვალობის წესების ცვლილებები ევროპარლამენტის პრეზიდენტმა რობერტა მეცოლამ ამ კვირაში უნდა წარადგინოს. აღნიშნული ინიციატივა ე.წ. კატარ-გეითის კორუფციულ სკანდალთანაა დაკავშირებული.
2 წყაროზე დაყრდნობით Politico წერს, რომ მეცოლა 14 წინადადებას წარადგენს. დროებითი ლობირების აკრძალვის გარდა, ევროპარლამენტარები ვალდებული იქნებიან გაასაჯაროონ ინფორმაცია შეხვედრების, შემოსავლების წყაროებისა და ევროკავშირის არაწევრ ქვეყნებთან არაოფიციალური კავშირების შესახებ.
ევროპარლამენტარებისადმი ნდობა დეკემბერში შეილახა, როდესაც ბელგიის ხელისუფლებამ მათ წინააღმდეგ ქრთამის აღების ბრალდებით გამოძიება დაიწყო.
Politico-ს ინფორმაციით, რობერტა მეცოლა აღნიშნულ ინიციატივებს, პარლამენტის ცხრა პოლიტიკური ჯგუფის ხელმძღვანელთან, დახურულ შეხვედრაზე, დღეს განიხილავს.