ევროპარლამენტმა ბლოკის კიბერუსაფრთხოების წესების გაძლიერებას მხარი დაუჭირა. მრეწველობის, კვლევისა და ენერგეტიკის კომიტეტის წევრებმა ახალი წესები 70 ხმით 3-ის წინააღმდეგ მიიღეს.

პარლამენტის დონეზე ევროპული ქსელების უსაფრთხოების გაუმჯობესებასთან დაკავშირებით კონსენსუსი იშვიათი შემთხვევაა. 

ბარტ გროთუისმა, ევროპარლამენტარმა, რომელიც ინიციატივებზე მუშაობდა, განმარტა, რატომ არის განახლება ასე გადამწყვეტი. “ძალიან მნიშვნელოვანია, ვიმოქმედოთ სწრაფი ტემპით, რათა ჰაკერებმა არ ამჯობინონ ევროპაზე ორიენტირება”,- განაცხადა ევროპარლამენტარმა.

ზოგიერთი ექსპერტი ამტკიცებს, რომ რაც უფრო მაღალია უსაფრთხოება, მით მეტია კონტროლი, მაგრამ იოან კასიანიდესი, ციფრული ნდობის ალიანსის მმართველი დირექტორი ამბობს, რომ ყველაფერი პირიქითაა.

“კიბერუსაფრთხოება არ ზღუდავს მომხმარებელს და არ არის საშიში. პირიქით, კომპანიების მიერ შემუშავებული ინსტრუმენტები და გადაწყვეტილებები ჩვენი თავისუფლებების დაცვის გარანტიას იძლევა და ამიტომ აუცილებელია, მარეგულირებელ ორგანოებს მივცეთ შესაძლებლობა, დაგვიცვან”,- განაცხადა კასიანიდესმა.

გროთუისი ასევე ამტკიცებს, რომ ევროკავშირი ძალიან ჩამორჩება სხვა დიდ ქვეყნებს. “ჩვენ დაახლოებით 41%-ით ნაკლებ ინვესტიციას ვდებთ კიბერუსაფრთხოებაში, ვიდრე ამერიკელები. ძალიან მნიშვნელოვანია, ასე მოვიქცეთ, რათა თავიდან ავიცილოთ საფრთხეები, რომლებიც ძირითადად მოდის რუსეთიდან, როდესაც საქმე ეხება გამოსასყიდ პროგრამებს, მაგრამ ასევე სახელმწიფოს თავდასხმებს ჩინეთიდან, ირანიდან და სხვებისგან, რომლებიც ცდილობენ შეაღწიონ ჩვენს ქსელებში გეოპოლიტიკური გავლენის  მოსაპოვებლად”,- განაცხადა გროტუისმა.

ევროპარლამენტს ახლა მოუწევს მოლაპარაკება 27 წევრ სახელმწიფოსთან, რათა მიაღწიოს შეთანხმებას ახალი წესების ამოქმედებაზე. ამის შემდეგ, ყველა ევროპარლამენტარმა უნდა გადაწყვიტოს, დაეთანხმება თუ არა იმას, რაც მოლაპარაკებების შედეგად გადაწყდება, სანამ ინიციატივა კანონად იქცევა.

წყარო: "ბიზნეს ფორმულა"