ევროპარლამენტის დეპუტატებმა 23 ნოემბრის სხდომაზე მიიღეს რეზოლუცია, რომლითაც რუსეთს ტერორიზმის ხელშემწყობ სახელმწიფოდ ცნობენ, იმ სასტიკი და არაადამიანური ქმედებების გამო, რაც მან უკრაინაში ჩაიდინა. დეპუტატებმა განაცხადეს, რომ ნიადაგს ამზადებენ საიმისოდ, რომ რუსეთის პრეზიდენტი ვლადიმირ პუტინი და მისი მთავრობა საერთაშორისო ტრიბუნალის წინაშე წარდგნენ.
რუსეთის ფედერაციის მიერ უკრაინის მშვიდობიანი მოსახლეობის წინააღმდეგ განხორციელებული მიზანმიმართული თავდასხმები და სისასტიკე, სამოქალაქო ინფრასტრუქტურის განადგურება და ადამიანის უფლებებისა და საერთაშორისო ჰუმანიტარული სამართლის სხვა სერიოზული დარღვევები, არის უკრაინელების წინააღმდეგ ჩადენილი ტერორისტული აქტი და და სამხედრო დანაშაული — ნათქვამია ევროპარლამენტარების რეზოლუციაში.
დეპუტატებმა ევროკავშირის ქვეყნებს მოუწოდეს, ხელი შეუწყონ უკრაინის წინააღმდეგ რუსეთის აგრესიასთან დაკავშირებული სპეციალური ტრიბუნალის შექმნას. კენჭისყრის წინ აღინიშნა, რომ დოკუმენტი უნდა იქცეს ნაბიჯად რუსეთის პრეზიდენტ ვლადიმირ პუტინისა და მისი მთავრობის სამართლებრივი დევნის გზაზე.
რეზოლუცია ევროპის ქვეყნებს არ ავალდებულებს რაიმე მოქმედებას და სიმბოლურ ხასიათს ატარებს. მის მიღებას მხარი დაუჭირა 494-მა დეპუტატმა, 44-მა თავი შეიკავა, 58 წინააღმდეგი იყო.
უკრაინის პრეზიდენტი ვოლოდიმირ ზელენსკი ტვიტერში გამოეხმაურა აღნიშნული რეზოლუციის მიღება.
„რუსეთი იზოლირებული უნდა იყოს ყველა დონეზე და პასუხისმგებლობა უნდა დაეკისროს, რათა დაასრულოს თავისი მრავალწლიანი ტერორიზმის პოლიტიკა უკრაინასა და მთელ მსოფლიოში“, — წერს ვოლოდიმირ ზელენსკი ტვიტერში.