ევროპაში 1,7 მილიონი ტონა ტექსტილის ნარჩენი გროვდება, რომელიც საბოლოოდ გადამუშავდება ან ნაგავსაყრელზე ხვდება. ასევე, ამ ნარჩენის უმეტეს ნაწილს აფრიკისა და აზიის ქვეყნები იღებენ. ამის შესახებ ევროპის გარემოს დაცვის სააგენტოს ანგარიშში არის ნათქვამი, რასაც პორტალი WWD (Women's Wear Daily) ავრცელებს.
სააგენტოს ცნობით, ორ ათწლეულში ევროპიდან გამოყენებული ტექსტილის, მათ შორის ტანსაცმლისა და ფეხსაცმლის ექსპორტი სამჯერ გაიზარდა. კერძოდ, თუ 2000 წელს ევროპის 27 ქვეყნიდან ამ ექსპორტმა 550 ათას ტონაზე ოდნავ მეტი შეადგინა, 2019 წელს ნარჩენების რაოდენობა 1,7 მილიონ ტონამდე გაიზარდა.
ევროპული ტექსტილის ნარჩენების უმეტეს ნაწილს აფრიკის ქვეყნები იღებენ, რომლის წილიც ამ ექსპორტში 46%-ს შეადგენს. ნივთების ნაწილი მეორად მაღაზიებში ხელახლა იყიდება, თუმცა მათი უმეტესობა ნაგავსაყრელზე ხვდება.
აზიის ქვეყნები ევროკავშირიდან გამოყენებული ტექსტილის 41%-ს იღებს. აფრიკისგან განსხვავებით, აზიაში ტექსტილის გადამუშავება და მისი ხელმეორედ გამოყენება შესაძლებელია.
მოხსენებაში ხაზგასმულია, რომ ადამიანები ნახმარ ტანსაცმელს ქველმოქმედებას ხშირად სწირავენ და ფიქრობენ, რომ მას გაჭირვებულები ხელახლა გამოიყენებენ, რაც ხშირად ასე არ ხდება.
„საზოგადოებრივი წარმოდგენა იმის შესახებ, რომ შემოწირული მეორადი ტანსაცმლით ამ რეგიონებში ყოველთვის სარგებლობენ, სიმართლეს არ შეესაბამება,“ - ნათქვამია მოხსენებაში.
ევროპა
