ევროკავშირის სანქციების მეექვსე პაკეტი, რომელიც ნავთობის ემბარგოსაც უნდა მოიცავდეს, რუსეთის წინააღმდეგ უკანასკნელი არ იქნება. სხვა სანქციებიც არსებობს, რომლებიც უკრაინას რუსეთის დასასუსტებლად სჭირდება.
მიიღე ინფორმაცია უფრო სწრაფად „კომერსანტის“ Telegram-ზე.
ამის შესახებ უკრაინის პრეზიდენტის ოფისის ხელმძღვანელის მოადგილემ იგორ ჟოვკვამ ტელემარათონის ეთერში განაცხადა, წერს RBC-Ukraine.
„ნავთობზე ემბარგოს გარეშე სანქციების მეექვსე პაკეტი არ სჭირდება უკრაინას, ვინაიდან ეს ერთ–ერთი უმთავრესი სანქციაა, რომლის მიღებაც დღესვეა საჭირო და რაც აუცილებლად მყისიერ შედეგს გამოიღებს“, – თქვა ჟოვკვამ.
მისივე თქმით, არსებობს რამდენიმე ქვეყანა, რომლებიც არ ეთანხმებიან რუსულ ნავთობზე ემბარგოს დაწესებას, თუმცა მათთან ინტენსიური მოლაპარაკებები გრძელდება.
ევროკავშირის ანტირუსული სანქციების მეექვსე პაკეტის შეთანხმება სწორედ ნავთობის ემბარგოს საკითხის გამო ვერ ხერხდება.
ამასობაში რუსეთის წინააღმდეგ სანქციებს აფართოებს იაპონია, რომლის საგარეო უწყებამაც რუსეთის 133 მოქალაქე შეზღუდა უკრაინის წინააღმდეგ განხორციელებული სამხედრო აგრესიის გამო. ამის შესახებ ინფორმაციას სააგენტო Reuters ავრცელებს.
იაპონიის მიერ სანქცირებულთა შორის არიან რუსეთის პრემიერ–მინისტრი მიხაილ მიშუსტინი, რუსეთის უშიშროების საბჭოს მდივნის მოადგილე რაშიდ ნურგალიევი, ასევე ბიზნესმენ გენადი ტიმჩენკოს ნათესავები.
დაბოლოს, აშშ–ის პრეზიდენტმა ჯო ბაიდენმა ხელი მოაწერა კანონს უკრაინისთვის ლენდ–ლიზის ამოქმედების შესახებ. ეს კანონი უკრაინისთვის ამერიკული შეიარაღების მიწოდებას დააჩქარებს.
ეს ისტორიაში მეორე შემთხვევაა, როდესაც აშშ ასეთ ნაბიჯს დგამს. პირველად, მეორე მსოფლიო ომის მიმდინარეობის დროს, ლენდ–ლიზი იყო სისტემა, რომელიც აშშ–ის ევროპელი მოკავშირეებისთვის სამხედრო დახმარებას ითვალისწინებდა. პირველად ეს კანონი 1941 წლის მარტში მიიღეს, როდესაც ევროპაში ომი უკვე წლინახევრის დაწყებული იყო.
თავის დროზე ნაციზმთან ბრძოლაში ლენდ–ლიზმა უდიდესი როლი შეასრულა.