ევროზონაში ინფლაციამ ყველა დროის მაქსიმუმს მიაღწია და მოლოდინს გადააჭარბა, რადგან უკრაინაში რუსეთის შეჭრა ენერგეტიკული ხარჯების კიდევ უფრო სწრაფი ტემპით ზრდის რისკს ქმნის.
სამომხმარებლო ფასები თებერვალში გასულ წელთან შედარებით 5,8%-ით გაიზარდა და აჭარბებს Bloomberg-ის მიერ გამოკითხულ ეკონომისტთა საშუალო შეფასებას - 5,6%-ს. საბაზო ინფლაცია 2.7%-მდე დაჩქარდა.
მაჩვენებლები მაშინ გამოქვეყნდა, როცა გერმანიის ცენტრალურმა ბანკმა განაცხადა, რომ 2022 წელს გერმანიაში ინფლაცია შეიძლება საშუალოდ 5% იყოს. თუმცა, ბუნდესბანკი ინფლაციის გრძელვადიანი მოლოდინების გაქრობის ნიშნებს ვერ ხედავს.
ბაზრები მერყეობენ. გერმანიის 10-წლიანი ინფლაციისგან დაცული ვალის განაკვეთი ცხრა საბაზისო პუნქტით - 2,51%-მდე დაეცა, რაც დღის ბოლოს რეკორდულად დაბალი იყო. იმავდროულად, გერმანიის 10-წლიანი ობლიგაციების შემოსავლიანობა გაიზარდა ოთხი საბაზისო პუნქტით მინუს 0,040%-მდე, რადგან ევრო განაგრძობდა ვაჭრობას 2020 წლის მაისის შემდეგ ყველაზე დაბალ დონეზე.
ენერგეტიკა დარჩა ინფლაციის მთავარ ხელშემწყობად და Deutsche Bank-ის ანალიზი აჩვენებს, რომ ნავთობსა და ბუნებრივ აირზე ფასების ზრდა ევროს ვარდნისკენ უბიძგებს და იწვევს “მანკიერ ინფლაციურ სპირალს”.
მონაცემები გამოქვეყნდა ევროპის ცენტრალური ბანკის ოფიციალური პირების შეხვედრამდე ერთი კვირით ადრე.
“ჯერ კიდევ არის მნიშვნელოვანი ინფლაციური ზეწოლა”,- განაცხადა Commerzbank-ის უფროსმა ეკონომისტმა, კრისტოფ ვეილმა, რომელიც ელის, რომ ტენდენცია მომდევნო თვეებშიც გაგრძელდება.
“ეს ნიშნავს, რომ შემდეგი ინფლაციის შოკი უკვე მარტში დგება. ვვარაუდობთ, რომ ინფლაციის მაჩვენებელი 6%-იან ზღურბლს გადალახავს”.
პანდემიის შემსუბუქებისას ევროპის ეკონომიკა აღდგენის რეჟიმშია. პოლიტიკის შემქმნელები ამბობენ, რომ აქტივების შესყიდვების შეზღუდვა კვლავ მათი მიზანია, მაგრამ მიანიშნებენ, რომ ობლიგაციების ყიდვის შეწყვეტის გადაწყვეტილება სავარაუდოდ გადაიდება, რადგან აქცენტი გადადის ბრძოლის გვერდითი ეფექტების შეკავებაზე.
ბევრი რამ იქნება დამოკიდებული იმაზე, თუ როგორ იმოქმედებს რუსული ზეწოლა ევროზონის ეკონომიკაზე, რომელიც ჯერ კიდევ განიცდის მიწოდების დეფიციტს, ვირუსით გამოწვეულ გახანგრძლივებულ შეზღუდვებს და ენერგომომარაგების პრობლემას.
ECB-ის მთავარი ეკონომისტის, ფილიპ ლეინის პროგნოზით, კრიზისი გამოიწვევს წარმოების 0,3-0,4 პროცენტული პუნქტით შემცირებას მიმდინარე წელს.
ლეინის კოლეგამ აღმასრულებელ საბჭოში, იზაბელ შნაბელმა, ივარაუდა, რომ ინფლაცია შეიძლება კიდევ უფრო გაიზარდოს უახლოეს მომავალში და არ შენელდეს “ისე სწრაფად, როგორც ადრე ველოდით". მან ასევე თქვა, რომ ფასების ზრდა არ ჩამოვა ECB-ის სამიზნე 2%-ზე დაბლა საშუალოვადიან პერსპექტივაში, რაც ერთ-ერთი პირობაა იმისთვის, რომ პოლიტიკოსებმა განიხილონ საპროცენტო განაკვეთების გაზრდა.
თუ უკრაინა და რუსეთი უახლოეს დღეებში სამშვიდობო შეთანხმებას არ გააფორმებენ, ნორდეას ეკონომისტები წელს რეფინანსირების განაკვეთის ზრდას არ ელიან.
მმართველი საბჭოს წევრმა, ოლი რენიმ Bloomberg-ს განუცხადა, რომ “ნორმალიზაციის მიმართულება მაინც სწორი მიმართულებაა. ოფიციალურ პირებს დრო სჭირდებათ, რომ ყურადღებით შეაფასონ ომის შედეგები, სანამ გააგრძელებენ სტიმულირების პროგრამიდან გამოსვლას”.
წყარო: Bloomberg, businessformula.ge