ორი წლის განმავლობაში კორონავირუსული შეზღუდვების დროს დაგროვილი დანაზოგების წყალობით, ევროპელი მომხმარებლები რეკორდულ ინფლაციას ხარჯვაში ხელის შეშლის საშუალებას ჯერ კიდევ არ აძლევენ. ტენდენცია კონტინენტის პანდემიურ აღდგენას უდევს საფუძვლად.

ბოლო მონაცემებით, გარეთ კვებისა და მოგზაურობის აღდგენა საკმარისად ძლიერია იმისთვის, რომ ომისა და ჩინეთში პანდემიური აფეთქებების ფონზე წარმოების სისუსტეების კომპენსირება მოახდინოს.

ხარჯვის აღდგენის სიძლიერე აღვივებს ოპტიმიზმს, რომ არა მხოლოდ რეცესიაა თავიდან არიდებადი, არამედ სტაგფლაციაც. ეს ევროპის ცენტრალურ ბანკს ეხმარება განახორციელოს რეფინანსირების განაკვეთის გაზრდის შესახებ გეგმები, რომელიც ათწლეულის განმავლობაში პირველად დგას დღის წესრიგში.

აღდგენის პროცესს, ევროპაში კონფლიქტის მიუხედავად, ეხმარება პანდემიური შეზღუდვების დასრულება და ვაქცინირებული ან ვირუსისგან გამოჯანმრთელებული ადამიანების მზარდი რაოდენობაც. ამასთან, რეკორდულად დაბალ ნიშნულზეა უმუშევრობა და შინამეურნეობებში დანაზოგების სახით არსებობს $753 მილიარდი.

ოპტიმისტური ხედვის მოწინააღმდეგეები აცხადებენ, რომ გაზრდილი მოთხოვნა ფასების რეკორდულ ზრდად ვერ გადააჭარბებს. გასულ თვეში ევროზონის 19 წევრისთვის ინფლაციამ 8.1%-ს მიაღწია, რაც ცხოვრების ღირებულების გარშემო შფოთვებს აძლიერებს. უკრაინაში ომმა შესაძლოა კიდევ უფრო გააუარესოს სიტუაცია, განსაკუთრებით ზაფხულის დასრულებასა და გათბობის გადასახადების დაბრუნებასთან ერთად.

თუმცა, ევროპის აეროპორტებში საერთო სურათი, პერსონალის ნაკლებობა და მგზავრების სიჭარბე, აჩვენებს, რომ ფასების ზრდა ვერ აჩერებს მათ, ვისაც ჯერ კიდევ შეუძლიათ გასწვდნენ მოგზაურობას.

ოპტიმისტურ სენტიმენტს იზიარებენ კომპანიებიც. ტურიზმის გიგანტი TUI ვარაუდობს, რომ 2-წლიანი კრიზისის შემდეგ მოგებაზე გავა, ხოლო Booking-ი რეკორდულ საზაფხულო სეზონს ელის.

პარალელურად, გერმანელების ნახევარი აცხადებს, რომ ძველებურ ცხოვრების წესს ინფლაციის გამო ვეღარ სწვდება. თუმცა, ნიშნები აჩვენებს, რომ ხარჯვის შემცირება მხოლოდ გარკვეული მიმართულებებით ხდება, რაც სერვისებს არ მოიცავს.

პრიორიტეტების ამგვარი დალაგება ასევე ფაქტორია ევროპის ცენტრალურ ბანკისთვისაც, რაც სტიმულისა და ნეგატიური რეფინანსირების განაკვეთის დასრულებას ნიშნავს. S&P Global-ის ბიზნეს გამოკითხვები აჩვენებს, რომ ევროზონა "გამამხნევებლად ურყევი" რჩება, რაც დიდწილად მომსახურების სექტორის, განსაკუთრებით ტურიზმისა და დასვენების დამსახურებაა.

მიუხედავად ამისა, ომი და მისი დამღუპველი ეფექტები გავრცელდება ევროპის ეკონომიკაზეც, სადაც ხელფასების ზრდა ინფლაციას ჩამორჩება, ხოლო ღარიბი შინამეურნეობები განსაკუთრებით ზარალდებიან. თუმცა, ევროკომისიის ეკონომიკური ზრდის პროგნოზი 2022 წლისთვის მაინც 2.7%-ია.

დამატებით ფაქტორია ისიც, რომ დანაზოგების ხარჯვის სტიმულმა შესაძლოა კიდევ რამდენიმე თვე გასტანოს. UBS Global Wealth Management-ის ეკონომისტის, დინ ტერნერის თქმით, ოპტიმისტურ ტენდენციას ამყარებს უმუშევრობის 6,8%-იანი დონეც, რაც ასევე ამცირებს უკრაინის კონფლიქტის შედეგად გამოწვეულ შფოთებს სამუშაო ადგილებთან დაკავშირებით.

წყარო: Bloomberg,  businessformula.ge