ამერიკულმა ExxonMobil-მა შორეული აღმოსავლეთის თხევადი ბუნებრივი გაზის (LNG) პროექტი გაყინა. ამის შესახებ რადიოსადგურ „კომსომოლსკაია პრავდას“ ხაბაროვსკის მხარის გუბერნატორმა, მიხაილ დეგტიარევმა განუცხადა.
„ამერიკელების მიერ გამოცხადებული დე-კასტრის პორტ-სახალინის მილსადენის პროექტი, მათი ინდივიდუალური გადაწყვეტილებით, გაყინულია. რატომ კეთდება ეს, მაოცებს?! ეს არის საკუთარ ფეხში სროლა. არის გაზი, არის სანაპირო, არის შრომითი რესურსი და ინვესტიციები, თუმცა პროექტს პოლიტიკური მიზეზების გამო მაინც ყინავენ,“ - აცხადებს შეშფოთებული გუბერნატორი.
მისი თქმით, უკრაინაში ომის დაწყებამდე ერთი თვით ადრე, Exxon-ის წარმომადგენლებს შეხვდა, რომლებმაც „გამოხატეს მზადყოფნა და წინასწარი საპროექტო სამუშაოები ჩაატარეს.“
Exxon Neftegaz Limited, რომელიც არის ExxonMobil-ის შვილობილი კომპანია, Sakhalin 1-ის პროექტის ოპერატორია. მან თებერვალში შორეული აღმოსავლეთის LNG პროექტისთვის კონტრაქტორების შესარჩევად სატენდერო კამპანია წამოიწყო. კომპანია კონტრაქტორებად სამშენებლო მასალების ხარისხის შემფასებლებსა და რკინაბეტონის პროდუქციის მწარმოებლებს ეძებდა.
ხაბაროვსკის მხარის სოფელ დე-კასტრის მახლობლად, წელიწადში 6,2 მილიონი ტონა სიმძლავრის LNG ქარხნის მშენებლობა Sakhalin 1-ის კონსორციუმის ფარგლებში იგეგმებოდა, რისი მიზანიც სახალინის შელფის გაზის რეზერვების მონეტიზაცია იყო. ფედერაციის ენერგეტიკის სამინისტროს მონაცემებით, შორეული აღმოსავლეთის LNG პროექტის ღირებულება, 4,2 მლრდ დოლარად არის შეფასებული, რომლის გაშვებაც 2027-2028 წლებში იგეგმება. ქარხნის წინასწარი დაპროექტება TechnipFMC-ს, იაპონურ JGC Corporation-თან ერთად უნდა განეხორციელებინა.
ExxonMobil-მა პროექტ Sakhalin 1-იდან გასვლის შესახებ ჯერ კიდევ 2 მარტს განაცხადა და რუსეთში ინვესტირებაზე უარი თქვა. კომპანიის მიერ გავრცელებულ მაშინდელ განცხადებაში ნათქვამია, რომ ExxonMobil-მა, რომელიც პროექტ Sakhalin 1-ს იაპონური, ინდური და რუსული კომპანიების საერთაშორისო კონსორციუმის სახელით მართავს, უკრაინის ომის საპასუხოდ ოპერაციების შეწყვეტის პროცესი დაიწყო, ხოლო Sakhalin 1-ის პროექტიდან გასასვლელად მომავალ ნაბიჯებს შეიმუშავებს.
Sakhalin 1-ის პროექტში ExxonMobil-სა და იაპონურ SODECO-ს თანაბრად 30-30%-იანი, ხოლო „როსნეფტსსა“ და ინდურ ONGC-ს ცალ-ცალკე 20%-იანი წილი ეკუთვნით. პროექტის საბადოს მთლიანი მარაგი 307 მილიონ ტონა ნავთობსა და 485 მილიარდ კუბურ მეტრ ბუნებრივ გაზს შეადგენს.
ExxonMobil
