2022 წელს რუსეთის მოქალაქეებმა ქართულ ბანკებში 60 ათასზე მეტი ანგარიში გახსნეს, ხოლო მათ მიერ მიმდინარე ანგარიშებზე და დეპოზიტებზე განთავსებული თანხის მოცულობა 2021 წელთან შედარებით თითქმის 4-ჯერ გაიზარდა და 2.8 მლრდ ლარს მიაღწია. 2022 წელს რუსეთიდან საქართველოში ფულადი გზავნილები 5-ჯერ გაიზარდა და 2.1 მლრდ აშშ დოლარი შეადგინა. ასეთი მაღალი ზრდის მთავარი მიზეზი საქართველოში საცხოვრებლად გადმოსული რუსეთის მოქალაქეებია, რომლებსაც რუსეთიდან უგზავნიან ფულს.
ფინანსისტი, თავისუფალი უნივერსიტეტის ბიზნესსკოლის დეკანი გიგა ბედინეიშვილი „კომერსანტთან“ ამბობს, რომ რუსების შემოსვლამ დადებითი ეკონომიკური ეფექტი მოგვცა, თუმცა პრობლემა ისაა, რომ საქართველოს ეკონომიკის აწყობა რუსეთზე არ უნდა მოხდეს.
„მიგრაციის პირველი ტალღის პერიოდში ჩამოსული რუსების გარკვეული წილი ეკონომიკურად შედარებით წელგამართული ხალხია. ეს ადამიანები ფრილანსერებად მუშაობენ და ანგარიშებს ქართულ ბანკებში ხსნიან. თუმცა, ისინი შესაძლოა, ჯერ კიდევ რუსულ ბანკებში იღებდნენ ხელფასს და გადმორიცხვებს შემდეგ აკეთებდნენ. ასევე შესაძლოა, რუსებს რუბლები ნაღდი სახითაც შემოჰქონდეთ, შემდეგ ბანკებსა და გადასახურდავებელ პუნქტებში ახურდავებდნენ, ხოლო დოლარები უკან, რუსეთში გაჰქონდეთ. ყველას არ ამოწმებენ საზღვარზე, შეზღუდვებიც არაა ისეთი, რომ ნაღდი ფულით რუბლი ვერ შემოიტანონ.
რუსეთიდან ფულადი გზავნილები პირდაპირ კავშირშია მათ შემოსვლასთან. ვიღაც შემოდის რუსეთიდან, ანგარიში აქვს რუსეთში და შემდეგ ფული გადმოაქვს აქ, ეს პროცესია თითქმის ერთი წელია. ფაქტია, რომ რუსების შემოსვლამ მოგვცა დადებითი ეკონომიკური ეფექტი. ჩვენი პრობლემა ისაა, რომ რუსეთზე არ უნდა ავაწყოთ საქართველოს ეკონომიკა. ისინი დღეს შემოვიდნენ, ხვალ – წავლენ. საქართველოს ხელისუფლებას რომ ჰქონოდა სწორი ეკონომიკური პოლიტიკა, ეს გავლენა არ იქნებოდა ასეთი მაღალი. ამას სჭირდება სწორი პრივატიზაცია, დამოუკიდებელი სასამართლო, პრემიერი არ უნდა იძახდეს, ფასებს გავაკონტროლებო და ივანიშვილიც არ უნდა მართავდეს ქვეყანას“ — აცხადებს გიგა ბედინეიშვილი