მედიკამენტების გაიაფებასთან დაკავშირებით ქართული ფარმაცევტული კომპანიები თურქულ მხარესთან მოლაპარაკებებს აწარმოებენ, თუმცა ჯერჯერობით მედიკამენტების არც ერთი პარტია დაკონტრაქტებული არ არის, ვინაიდან ხელშეკრულება მხარეებს შორის არ გაფორმებულა. საქართველოს პრემიერ–მინისტრის ირაკლი ღარიბაშვილის განცხადებით, თურქეთიდან წამლების იმპორტი უახლოეს რამდენიმე კვირაში განხორციელდება, თუმცა ფარმაცევტული კომპანიები კონკრეტულ ვადას ამ ეტაპზე ვერ ასახელებენ.
როგორც PSP-ს საზოგადოებასთან ურთიერთობის სამსახურის ხელმძღვანელი ნათია ხაბეიშვილი ,,კომერსანტთან“ აცხადებს, მუშაობა დაწყებულია და პროცესი მიმდინარეობს, თუმცა შეთანხმება ბოლომდე მიღწეული არ არის.
,,პროცესი მიმდინარეობს, ჯერჯერობით არაფერი ხელჩასაჭიდი, რის საფუძველზეც შეიძლება შეღავათიან ფასად წამლების შემოტანის კონკრეტული ვადა დავასახელოთ. კონტრაქტების გარდა რიგი პროცესებია, აქტიურად ვართ ჩართული მოლაპარაკებებში. მთავარია, რომ მუშაობა დაწყებულია. ცხადია, რეგულაციას თავისი ტექნიკური საკითხები ახლავს და დაველოდებით, საბოლოოდ როგორ ჩამოყალიბდება კანონმდებლობა თურქულ ბაზართან დაკავშირებით. მედიკამენტების მიმოქცევა მკაცრად რეგულირებადი პროცესია, რომელიც ბევრ საკითხთან არის დაკავშირებული, მათ შორის, მნიშვნელოვანია რეგისტრაცია. მაქსიმალურად ყველაფერი კეთდება, რომ ქართველი მომხმარებლისთვის ხელმისაწვდომი გავხადოთ წამლები, რომელიც თურქეთის ბაზარზე უფრო იაფია. შესაბამისად, ადგილობრივ ქსელებშიც დაბალ ფასად ჩაეშვება“, - ამბობს ნათია ხაბეიშვილი ,,კომერსანტთან“.
თურქული წამლების იმპორტისთვის მზად არის ,,იმპექსიც“, რომელიც ასევე აწარმოებს მოლაპარაკებებს თურქულ მხარესთან, თუმცა საქმე მედიკამენტების დაკონტრაქტებამდე ჯერჯერობით არ მისულა. ფარმაცევტული კომპანია ,,იმპექსის“ მენეჯერი ნინო ჯოხარიძე ამბობს, რომ დეტალები, თუ რა შედეგს მიაღწევენ თურქ პარტნიორებთან, დაახლოებით ერთ კვირაში გამოიკვეთება.
,,პროცესში ვართ, ჯერჯერობით მოლაპარაკების ეტაპს გავდივართ. მომავალ კვირას სიტუაცია მეტნაკლებად გამოიკვეთება და დაზუსტებით შეგვეძლება საუბარი, რა ფასად შევძლებთ წამლების შესყიდვას და რა ფასწარმოქმნა გვექნება. მზად ვართ, ხელი შევუწყოთ იაფი მედიკამენტების შემოსვლას ქართულ ბაზარზე, რაც მოსახლეობის ყოფას შეამსუბუქებს. დეტალებზე სრულად ვისაუბრებთ მას შემდეგ, რაც კონტრაქტი შედგება და მომწოდებელთან შევთანხმდებით, სავარაუდოდ, ერთ კვირაში“, - ამბობს ,,იმპექსის“ მენეჯერი ,,კომერსანტთან“.
ცნობისთვის, პრემეირ-მინისტრმა ირაკლი ღარიბაშვილმა 14 თებერვალს მთავრობის სხდომაზე განაცხადა, რომ უახლოეს რამდენიმე კვირაში დაიწყება თურქეთიდან იმპორტირებული მედიკამენტების აფთიაქებში შეტანა.
მთავრობის მეთაურმა ასევე აღნიშნა, რომ მარტიდან დაინერგება ელექტრონული რეცეპტების სისტემა, რომელიც ხელს შეუწყობს კონკურენციის გაძლიერებას.
პრემიერ-მინისტრის თქმით, მნიშვნელოვანია, რომ ადრე არსებული ბარიერები მოიხსნა და მაგალითად, მედიკამენტის იმპორტისთვის ლიცენზიის აღების ვადა 45 სამუშაო დღიდან 7 დღემდე შემცირდა.
მარი ჩიტაია