ფარმაცევტული სექტორი GMP სტანდარტების დანერგვის ვალდებულების გადავადებაზე პასუხს მთავრობისგან ელოდება.

როგორც საქართველოს ფარმაცევტთა ასოციაციის პრეზიდენტი ლევან გოგიბერიძე „ბიზნესპარტნიორთან“ აცხადებს, ამ საკითხთან დაკავშირებით მოლაპარაკებები ისევ მიმდინარეობს, საქმის კურსშია პრემიერის აპარატი, ეკონომიკის სამინისტრო, ჯანდაცვის სამინისტრო, პრემიერთან არსებული ინვესტორთა საბჭო, ბიზნესომბუდსმენი, ევროკავშირი-საქართველოს ბიზნეს საბჭო და ასე შემდეგ.

როგორც გოგიბერიძე აცხადებს, საქართველოში ნაციონალური GMP-ის სტანდარტის დანერგვა მომავალში ხელს შეუწყობს ფარმაცევტული პროდუქტის საექსპორტო შესაძლებლობის განვითარებას.

თუმცა,საქართველოს ფარმაცევტთა ასოციაციის მიერ მოწოდებული ინფორმაციის თანახმად, ფარმაცევტული წარმოების ნებართვის მფლობელებისთვის 2022 წლის 1 იანვრიდან სავალდებულო GMP-ი სტარდანრტიზაციაზე არსებული სტატუს ქვოს შენარჩუნება, გამოიწვევს საქართველოში ფარმაცევტული წარმოებების დიდი ნაწილის დახურვას. ეს კი 70 მილიონ ლარამდე სექტორში დამატებითი ინვესტიციისა და ექსპორტის 60 მლნ დოლარით შემცირების გარდა, გამოიწვევს 1500-მდე სამუშაო ადგილის დაკარგვას, ასევე საქართველოს ბაზრის დარჩენას ადგილობრივად წარმოებული მედიკამენტების ნაწილის გარეშე რაც, თავის მხრივ ფასების ზრდას გამოიწვევს.

„მიმდინარე წლის 15-20 აპრილს, ევროკავშირი-საქართველოს ბიზნეს საბჭოს და ჩვენი ასოციაციის თაოსნობით ჩატარდა მწარმოებლების გამოკითხვა, სულ დაფიქსირებულია 62 მწარმოებელი, გამოიკითხა ნახევარზე მეტი, აქედან ყველა თანახმაა გადავადებაზე, რა თქმა უნდა გონივრული ვადით. ეს ყველაფერი გაიგზავნა პარლამენტის დარგობრივ კომიტეტშიც. ამ დროისთვის ვიცით ის, რომ მუშაობა საკანონმდებლო და აღმასრულებელ ხელისუფლებაში მიმდინარეობს,“ - აცხადებს გოგობერიძე.

შეგახსენებთ, რომ 2022 წლიდან ფარმაცევტული კომპანიებისთვის GMP სტანდარტების დანერგვის ვალდებულება შემოდის. ინდუსტრიის ნაწილი ამას აპროტესტებს და აცხადებს, რომ კომპანიების დიდმა ნაწილმა შესაძლოა, საქმიანობა შეაჩეროს. ეს ის იმ შემთხვევაში მოხდება, თუ კომპანიები GMP სტანდარტების დანერგვას დათქმულ ვადებში ვერ შეძლებენ.

ექსპორტირებულ პროდუქციასთან თანაბარი პირობების შექმნის მიზნით, აუცილებელია, მოქმედ კანონმდებლობაში შევიდეს ცვლილება - ნებისმიერი იმპორტირებული სამკურნალო საშუალება უნდა აკმაყოფილებდეს GMP-ის იმავე სტანდარტს, რაც მოეთხოვება საქართველოში წარმოებულ პროდუქტს. დადგენილებით ეს ეხება მხოლოდ სამამულო მწარმოებლებს და არა იმპორტირებული პრეპარატების GMP სერთიფიკატის არმქონე წარმოებებს, რაც არასამართლიანი და დისკრიმინაციულია.

როგორც საქართველოს ფარმაცევტთა ასოციაციაში აცხადებენ, ამ სტანდარტის დანერგვა კომპანიებისგან მსხვილ ინვესტიციას საჭიროებს, შესაბამისი ფინანსური რესურსი კი კომპანიების უმეტესობას არ გააჩნია.

აღსანიშნავია, რომ GMP/GDP სტანდარტების დანერგვა ქვეყანაში ფარმაცევტული პროდუქტების მაღალ ხარისხის უზრუნველყოფის ერთ-ერთი წინაპირობაა. სტანდარტების დანერგვის რეკომენდაციას იძლევა ჯანმრთელობის მსოფლიო ორგანიზაციაც.

business-partner.ge