ფარმაკოლოგიურ საშუალებათა კლინიკური კვლევის ნებართვების გაცემის წესში და პირობებში ცვლილებები შედის. 20 ივლისის დადგენილების მიხედვით, რომელსაც ხელს პრემიერ-მინისტრი ირაკლი ღარიბაშვილი აწერს, აღნიშნულია რომ ფარმაკოლოგიური საშუალების კლინიკურ კვლევებთან დაკავშირებით შემდეგი სახის ზოგადი მოთხოვნები იმოქმედებს:

• პედიატრიული კვლევის განხორციელება საქართველოში დასაშვებია მხოლოდ იმ შემთხვევაში, თუ მას წინ უსწრებს მოზრდილთა კონტინგენტზე ჩატარებული კლინიკური კვლევა, რაც დასტურდება დოკუმენტურად სარგებლის უპირატესობით რისკთან მიმართებით.
• საქართველოში აკრძალულია ჯანმრთელ მოხალისეზე ონკოლოგიური, ციტოტოქსიური, იმუნოსუპრესული და აივ/შიდსის საწინააღმდეგო ფარმაკოლოგიური საშუალების კლინიკური კვლევის ჩატარება.
• კვლევის დაწყებამდე უნდა მოხდეს შესაძლო რისკებისა და დისკომფორტის შედარება იმ მოსალოდნელ სარგებელთან, რომელიც შესაძლოა, მიიღოს კვლევის ცალკეულმა პაციენტმა ან საზოგადოებამ. კვლევა შეიძლება, დაიწყოს ან გაგრძელდეს მხოლოდ იმ შემთხვევაში, თუ მოსალოდნელი სარგებელი ამართლებს რისკებს.
• კლინიკური კვლევა არ შეიძლება, ჩაუტარდეს უცხო ქვეყნის მოქალაქეს, ხოლო ადგილობრივი დამოუკიდებელი ეთიკის კომიტეტის სპეციალური გადაწყვეტილების გარეშე არ შეიძლება, ჩაუტარდეს დაუცველ პაციენტს.
• საკვლევი ფარმაცევტული პროდუქტის იმპორტ-ექსპორტი ხორციელდება ფარმაკოლოგიური საშუალების კლინიკური კვლევის ნებართვის საფუძველზე, ხოლო კვლევისათვის საჭირო თანმხლები და შემადარებელი ფარმაცევტული პროდუქტების იმპორტ-ექსპორტი მარეგულირებელი ორგანოს მიერ გაცემული წერილის საფუძველზე, კლინიკური კვლევის ვადის შესაბამისად.

„ფარმაკოლოგიურ საშუალებათა კლინიკური კვლევის, ფარმაცევტული წარმოების, ავტორიზებული აფთიაქის, სპეციალურ კონტროლს დაქვემდებარებულ სამკურნალო საშუალებათა იმპორტის ან ექსპორტის ნებართვების გაცემის წესისა და პირობების დამტკიცების თაობაზე“ საქართველოს მთავრობის 2019 წლის 16 ივლისის №335 დადგენილებაში ცვლილების შეტანის შესახებ 20 ივლისის დადგენილება გამოქვეყნებისთანავე ამოქმედდა.