თბილისში, რუსთაველის გამზირის #44-ში მდებარე რესტორანი „მარკო პოლო“ წლების წინ დაიხურა, ფართი კი ქირავდებოდა. როგორც „კომერსანტს“ რესტორნის ფართის მფლობელმა, ელენე დავითაიამ უთხრა, „მარკო პოლო” ჯერ კიდევ პანდემიის დაწყებისას დაიკეტა, თუმცა ახლა რუსთაველის #44 ნომერში მდებარე ფართი უკვე გაქირავდა.

„რესტორანი პანდემიის პრობლემების გამო დაიხურა. პანდემიამდე რენოვაცია გაკეთდა, შემდეგ პანდემია დაიწყო და მთელი ამ პერიოდის განმავლობაში რესტორანს არ უმუშავია. დღეს ფართი უკვე გაქირავებულია და მიმდინარეობს სარემონტო სამუშაოები, თუმცა მათი ინტერესებიდან გამომდინარე, ახალი მქირავებელის და მათი გეგმების შესახებ საუბარი არ შემიძლია”, – განმარტა ელენე დავითაიამ.

1990-იან წლებში რესტორანი „მარკო პოლოს“ პროექტის განხორციელება ცნობილმა მოცეკვავემ, საქართველოს სახალხო არტისტმა ჯუმბერ ბერაძემ დაიწყო. ცნობილი მოცეკვავე „კომერსანტთან“ ყვებოდა, რომ რუსთაველზე პატარა ფართი ჰქონდა, პატარა იყო ის კაპიტალიც, რომელიც რესტორნის კეთებისას მას გააჩნდა. ის იხსენებს, რომ პირველი კრედიტი „საქართველოს ბანკში“ აიღო, 150 000 დოლარი კი ის პირველი სასესხო კაპიტალი იყო, რომლითაც საქართველოს სახალხო არტისტი სარესტორნო ბიზნესში გადავიდა. წლების შემდეგ ჯუმბერ ბერიძეს სხვა ბიზნესების გადასარჩენად ფართის გაყიდვა მოუხდა.

რა ბედი ელის თბილისის ერთ-ერთ უძველეს რესტორანს, ჯერჯერობით უცნობია, იქნება ეს „მარკო პოლოს“ ახალ სიცოცხლე თუ მრავალწლოვანი ისტორიის დასასრული, რამდენიმე თვეში გავიგებთ.