ევროკავშირი შექმნის გაზის და სხვა ენერგომატარებლების შესყიდვის საერთო პლატფორმას, მათზე ფასების შემცირების მიზნით.
"შესყიდვების საერთო პლატფორმა ასევე ღია იქნება დასავლეთ ბალკანეთის ქვეყნებისთვის და სამი ასოცირებული აღმოსავლელი პარტნიორისთვის, ანუ საქართველოს, უკრაინის და მოლდოვის რესპუბლიკისთვის," - ამის შესახებ ნათქვამია ევროკავშირის საბჭოს მიერ ორდღიანი სამიტის შემდეგ გამოქვეყნებულ დასკვნით კომუნიკეში.
დოკუმენტის თანახმად, ევროკავშირი ეტაპობრივად გააუქმებს თავის დამოკიდებულებას რუსული გაზის, ნავთობისა და ქვანახშირის იმპორტზე რაც შეიძლება სწრაფად, როგორც ეს ვერსალის დეკლარაციაშია აღნიშნული.
რუსულ ენერგომატარებლებზე დამოკიდებულების შემცირების მიზნით, ევროპული საბჭო ელოდება ევროკომისიისგან 2022 წლის მაისის ბოლო ყოვლისმომცველი და ამბიციური გეგმის წარდგენას, რომელიც შემუშავებული იქნება ევროკავშირის წევრ ქვეყნებთან მჭიდრო კოორდინაციით. კომუნიკეს თანახმად, გათვალისწინებული იქნება ნაციონალური გარემოებები და წევრი ქვეყნების ენერგეტიკული ბალანსი.
დოკუმენტში ნათქვამია, რომ ენერგომატარებლების შესყიდვის საერთო პლატფორმა ღია იქნება დასავლეთ ბალკანეთის ქვეყნებისთვის და აღმოსავლეთ პარტნიორობის სამი ასოცირებული წევრისთვის – საქართველოსთვის, მოლდოვისა და უკრაინისთვის.
ევროკომისიას და წევრ ქვეყნებს ასევე დაევალათ, დაასრულონ და გაამჯობესონ ევროკავშირში გაზისა და ელექტროსისტემების კავშირი, მათ შორის ელექტროსისტემების სრული სინქრონიზაცია, ასევე ყველა წევრი ქვეყნისთვის ენერგოუსაფრთხოების უზრუნველყოფაზე მუშაობა.