ევროპის ცენტრალური ბანკის (ECB) ხელმძღვანელი კრისტინ ლაგარდი მონეტარული პოლიტიკის შემდგომ გამკაცრებას აანონსებს. მისი განცხადებით, ინფლაციური მოლოდინების მოსათოკად და ფასების დონის მიზნობრივ მაჩვენებელთა დასაახლოებლად, საპროცენტო განაკვეთები კიდევ გაიზრდება. მონატერული პოლიტიკის განაკვეთი აშშ-ს ფედერალურმა რეზერვმაც (FED) გაამკაცრა და რეფინანსირების განაკვეთის ზრდას არც მომავალში გამორიცხავს.

რა გავლენა ექნება ECB-ს და FED-ის მიერ მონეტარული პოლიტიკის გამკაცრებას საქართველოს საფინანსო სექტორზე, ამის შესახებ „კომერსანტს“ თიბისი ჯგუფის მთავარი ეკონომისტი ოთარ ნადარაია ესაუბრა.

„ჩვენი სესხების დაფინანსების მნიშვნელოვანი წყარო საერთაშორისო ბაზრებიდან მოდის, ამიტომ ეს გამკაცრება ჩვენი ეკონომიკისთვის, მსესხებლებისთვის და საერთაშორისო ბაზრებიდან მოზიდული თანხებისთვის კარგი ნამდვილად არ არის. უცხოეთში მაღალ საპროცენტო განაკვეთებს ზოგადად უარყოფითი გავლენა აქვს, ჩვენთანაც იზრდება ევროს ღირებულება, ვისაც ევროს მცურავგანაკვეთიანი სესხები აქვს. თუმცა აქ ორი მნიშვნელოვანი თემა არის, რომ დოლარს უფრო დიდი მნიშვნელობა აქვს გლობალური ბაზრებისთვის ვიდრე ევროს, განვითარებად ქვეყნებში მაინც დოლარის ბონდებია. ასევე ყოველთვის უნდა გავითვალისწინოთ რომ ბაზარზე ცვლილება მაშინ ხდება, როცა მოსალოდნელზე უფრო მეტი გამკაცრებაა.

ჩვენ მცირე ზომის ეკონომიკა ვართ და რა თქმა უნდა ვალუტის განაკვეთები ჩვენზე მოქმედებს. საზღვარგარეთ მაღალი განაკვეთები, ჩვენთან შემცირების ნაკლები არგუმენტია, თუმცა ორი მნიშვნელოვანი თემა არის, ერთი - ჩვენთან განაკვეთი ისედაც ძალიან მაღალია ამიტომ გაზრდა ნაკლებსავარაუდოა, მეორე - დოლარის განაკვეთი რომელიც ჩვენზე მაკრო დონეზე მოქმედებს უფრო არის ათწლიანი და არა როგორც ერთდღიანი. იმ ათწლიან განაკვეთში უკვე ასახულია ეს გამკაცრება და იქ უკვე პიკზეა, ამიტომ ამ მონაცემებით, გაზრდა აღარ არის მოსალოდნელი, პირიქით შემცირდება. არა მთლიანად იგივე, თუმცა დაახლოებით იგივე პროგნოზია 6 თვიანი განაკვეთის მხრივ, რაც ჩვენთვის უფრო რელევანტურია უშუალოდ სახსრების ღირებულების კუთხით. ანუ, ბაზრის მოლოდინებით FED კიდევ გააგრძელებს განაკვეთის აწევას რეჟიმში და 2023 წლის ბოლოს დაიწყებს დაწევას, მაგრამ ათწლიანი და 6 თვიანი განაკვეთები მომდევნო პერიოდში უფრო ადრე დაიწყებს შემცირებას. ამდენად, ამ მხრივ, ყველაზე უარეს სიტუაციაში ახლა ვართ და არა მომავალში ვიქნებით“, —  განაცხადა ოთარ ნადარაიამ.

ინფლაციის მოსათოკად ევროპის ცენტრალურმა ბანკმა რეფინანსირების განაკვეთი 0.75%-მდე უკვე გაზარდა. აშშ-ს ფედერალურმა რეზერვმა კი მონეტარული პოლიტიკა სექტემბრის ბოლოს 3,25%-იან ნიშნულამდე გაამკაცრა.