აშშ-ის ფედერალურმა სარეზერვო სისტემამ (Fed) მონეტარული პოლიტიკა ზედიზედ მეორე თვეში გამკაცრა და ინფლაციასთან გასამკლავებლად რეფინანსირების განაკვეთი ივნისის შემდეგ, ივლისშიც 0.75 პროცენტული პუნქტით გაზარდა.
ამერიკის ინფლაცია ორნიშნა ნიშნულთან ახლოსაა. ივნისში სამომხმარებლო ფასების ზრდამ 9.1% შეადგინა, რაც 40 წლის განმავლობაში ყველაზე მაღალი მაჩვენებელია. სწორედ ეს აიძულებს ფედერალურ რეზერვს აირჩიოს 1980 წლის შემდეგ ყველაზე აგრესიული გამკაცრების პოლიტიკა და მხოლოდ წელს განაკვეთი თითქმის 0%-დან 2.25-2.50%-მდე გაზარდოს.
ქვეყანაში არ ცხრება შიშები რეცესიასთან დაკავშირებითაც, თუმცა, Fed-ის თავკაცი, ჯერომ პაუელი მიიჩნევს, რომ ახლა აშშ რეცესიაში არ იმყოფება.
„ამჟამად ჩვენ რეცესია არ გვაქვს, ამის მიზეზი კი ისაა, რომ ეკონომიკის ძალიან ბევრი სექტორი შესანიშნავად მუშაობს. მოთხოვნა კვლავ მაღალია და ეკონომიკა წელს ზრდას გააგრძელებს“, - თქვა Fed-ის თავმჯდომარემ.
შემდეგი სხდომა ცენტრალურ ბანკში სექტემბერშია ჩანიშნული, ეკონომისტების აზრი კი საპროცენტო განაკვეთის მატებასთან დაკავშირებით ორადაა გაყოფილი - ნაწილი მიიჩნევს, მონეტარული განაკვეთი კიდევ 0.75 პროცენტული პუნქტით უნდა გამკაცრდეს, ნაწილი კი ფიქრობს, რომ ზრდა 0.50 პროცენტიანი უნდა იყოს.
პრესკონფერენციაზე ბანკის ხელმძღვანელმა თქვა ისიც, რომ განაკვეთის ზრდის ტემპის დაგდება მიზანშეწონილი იქნება, თუმცა პოლიტიკის შემქმნელებმა უნდა შეაფასონ, რა გავლენა ექნება განაკვეთის ზრდას ეკონომიკასა და ინფლაციაზე და გადაწყვეტილებაც ამის შემდეგ მიიღება.
მოსალოდნელია, რომ წელს Fed-ის საპროცენტო განაკვეთი 3.4%-ს, მომავალ წელს კი 3.8%-ს მიაღწევს.