ნიუ-იორკის ფედერალური სარეზერვო სისტემის (Fed) სამომხმარებლო მოლოდინების ყოველთვიური კვლევის მიხედვით, ივლისში ინფლაციის სამომხმარებლო პროგნოზი მნიშვნელოვნად შემცირდა საწვავის ფასის მკვეთრი ვარდნისა და მზარდი რწმენის ფონზე, რომ სურსათსა და საცხოვრებელზე ფასების სწრაფი ზრდა მომავალშიც შემცირდება. ანგარიშს CNBC ავრცელებს.
რესპონდენტები მოელიან, რომ ინფლაცია მომავალ წელს 6,2%-ს, ხოლო მომდევნო სამი წლის განმავლობაში 3,2%-ს შეადგენს. CNBC-ის შეფასებით, „მიუხედავად იმისა, რომ ეს ციფრები ისტორიული სტანდარტებით ჯერ კიდევ მეტად მაღალია, ისინი მაინც დიდ ვარდნაზე მიუთითებენ, რადგან ივნისის პროგნოზით, ინფლაციას მომავალ წელს 6.8%-ის, ხოლო მომდევნო სამი წლის განმავლობაში 3.6%-ის დონეზე მოელოდნენ.
შრომის სტატისტიკის ბიუროს ცნობით, ივნისის ჩათვლით, გასული წლის განმავლობაში სურსათზე ფასები 10.4%-ით გაიზარდა. მოსალოდნელია, რომ ისინი 6,7%-ით ისევ მოიმატებს, თუმცა ეს მონაცემი, ივნისის გამოკითხვასთან შედარებით, 2,5 პროცენტული პუნქტით ნაკლებია, რაც 2013 წლის ივნისიდან ყველაზე დიდი ვარდნაა მონაცემთა სერიაში.
ანალოგიურად უყურებენ რესპონდენტები საწვავის ფასსაც, რომელიც გასული წლის განმავლობაში 60%-ით გაიზარდა, თუმცა მომდევნო წლისთვის მხოლოდ 1,5%-იან მატებას მოელიან. ივლისის მოლოდინი 4,2 პროცენტული პუნქტით ნაკლებია ივნისთან შედარებით, რაც მეორე ყველაზე დიდი თვიური ვარდნაა კვლევის ისტორიაში.
AAA-ს (American Automobile Association) მონაცემებით, ჩვეულებრივი (regular) საწვავის ფასი გასული თვის განმავლობაში გალონზე, დაახლოებით, 67 ცენტით დაეცა, თუმცა ის ერთი წლის წინანდელ ფასთან შედარებით, მაინც 87 ცენტით მეტია. მთლიანობაში, ასევე, მნიშვნელოვნად დაეცა საქონლის ფასები.
საცხოვრებელი სახლების გაძვირებაზე ივნისისი პროგნოზის 4.4%-იან მაჩვენებელთან შედარებით, ივლისში ამ ფასებზე მხოლოდ 3.5%-ით ზრდას მოელიან, რაც ყველაზე დაბალი პროგნოზირებული ზრდაა 2020 წლის ნოემბრის შემდეგ. ასევე, 0,5 პროცენტული პუნქტით შემცირდა ხუთწლიანი ინფლაციური მოლოდინი, რაც 2,3%-მდე დაეცა.
ასეთი შედეგები მას შემდეგ დაფიქსირდა, რაც Fed-მა საპროცენტო განაკვეთები აგრესიულად გაზარდა ინფლაციის შესაჩერებლად, რომელიც 40 წელზე მეტი პერიოდის უმაღლეს ნიშნულზეა. CME Group-ის მონაცემებით, ცენტრალურმა ბანკმა 2022 წელს საბაზისო განაკვეთები ოთხჯერ, მთლიანობაში 2,25 პროცენტული პუნქტით გაზარდა, ხოლო საბაზრო ფასები სექტემბრისთვის ზედიზედ მესამედ, 0,75 პროცენტული პუნქტით ზრდაზე მიუთითებს.
თუმცა, CNBC ვარაუდობს, რომ ნიუ იორკის ფედერეზერვის ივლისის შედეგებმა შესაძლოა, Fed-ს უკან დახევის საფუძველი მისცეს და მან განაკვეთის ზრდა სექტემბრიდან მომავალი წლის ბოლოსთვის გადადოს, თუ ინფლაციის პროგნოზი გამართლდება. Fed გრძელვადიან პერსპექტივაში ინფლაციის 2%-ზე დაყვანას ისახავს მიზნად, ამიტომ „გამოკითხვაში პროგნოზირებული დონეები ცენტრალური ბანკის კომფორტის დონეს ბევრად აღემატება“.
გასული კვირის ბოლოს ნიუ იორკის Fed-ის მმართველმა, მიშელ ბოუმანმა განაცხადა, რომ უახლოეს მომავალში ინფლაციის შემცირებას არ მოელის და განაკვეთების უფრო მაღალი ზრდის შენარჩუნება საჭიროდ ჩათვალა. სან-ფრანცისკოს Fed-ის პრეზიდენტმა, მერი დეილიმაც იგივე გაიმეორა და დაამატა, რომ განაკვეთის ზრდა „დასრულებისგან ჯერ კიდევ შორს არის.“
ნიუ იორკის Fed-ის გამოკითხვამ, ასევე, აჩვენა, რომ მომავალი წლისთვის საოჯახო ხარჯების მთლიანი ზრდა, სავარაუდოდ, 6,9%-მდე შემცირდება. ეს გრძელვადიან პერსპექტივაში შედარებით მაღალი მაჩვენებელია, თუმცა მეტად დაბალია მაისის რეკორდულ 9%-იან მოლოდინებზე. 1,5 პროცენტული პუნქტით ყოველთვიური კლება ყველაზე მაღალი მაჩვენებელია კვლევის ისტორიაში.
ერთი თვის განმავლობაში ოდნავ უფრო ოპტიმისტურად განეწყვნენ მომხმარებლები აქციების ფასებზეც, როცა S&P 500 9%-ით გაიზარდა. ამჟამად მომხარებელთა 34.3% მომდევნო 12 თვის განმავლობაში აქციებზე უფრო მაღალ ფასებს მოელის.
Dow Jones-ის მონაცემებით, ივლისის სამომხმარებლო ფასების ინდექსს 0,2%-ით მაღალია, თუმცა ივნისის 1,3%-დან დაიკლო, ხოლო წლიური თვალსაზრისით ივლისში სამომხმარებლო ინფლაციის ტემპი 8,7%-მდეა, რაც, ასევე, ივნისის 9,1%-ზე ნაკლებია.
CPI-ის (Consumer Price Index) ანგარიში ოთხშაბათს გამოქვეყნდება, რომელიც, სავარაუდოდ, აჩვენებს, რომ ინფლაციამ პიკს საბოლოოდ მიაღწია. ინვესტორები, ასევე, ყურადღებით მოელიან ანგარიშს, რომ მიიღონ მინიშნებები, თუ რამდენად აგრესიული შეიძლება, იყოს ფასების ზრდასთან ბრძოლაში ფედერალური სარეზერვო ბანკი საპროცენტო განაკვეთების გაზრდის დროს.
ინფლაცია
