ჰოლანდიური საინვესტიციო კომპანია Exor, რომელიც იტალიელი ანელების ოჯახს ეკუთვნის, Veon ჯგუფის სიდიდით მეორე აქციონერი გახდა. ანელების ოჯახი Ferrari–სა და Fiat–ის მფლობელები იყვნენ და ახლა არაერთი ავტოკონცერნის მოწილეები არიან. ბოლო დროს Veon–ის აქციების ფასი სამჯერ დაეცა, ხოლო თავად კომპანია დიდ სირთულეებს განიცდის უკრაინაში რუსეთის სამხედრო ინტერვენციისა და რუსი ოლიგარქების წინააღმდეგ დასავლეთის მიერ დაწესებული სანქციების გამო.
მიიღე ინფორმაცია უფრო სწრაფად ჩვენს Telegram-ზე.
Exor აქციების 5%–ს ფლობს Veon–ში
ჰოლანდიურმა საინვესტიციო კომპანიამ სატელეკომუნიკაციო ჯგუფის Veon აქციების 5,1% იყიდა. ამის შესახებ ინფორმაცია ამერიკის ფასიანი ქაღალდების კომისიის საიტზეა განთავსებული. აღნიშნული პაკეტის ფასი 2012 წლის დასაწყისისთვის $151 მლნ–ს შეადგენდა, ხოლო დღეს მისი ფასი $53 მილიონია.
Fiat–ის დამფუძნებლების ოჯახი
Exor–ის უკან ბრიტანული Exor Capital დგას, რომელიც იტალიელი ანელების (Agnelli) ოჯახს ეკუთვნის. ოჯახის პატრიარქმა ჯოვანი ანელიმ Exor 1927 წელს დააფუძნა. იგი იტალიური ავტოკონცერნის Fiat ერთ–ერთი ფუძემდებელი იყო.
ამჟამად Exor წილებს ფლობს ავტოკონცერნებში Stellantis, Ferrari და Iveco, აგროკონცერნში CNH Industrial, გაზეთში The Economist, იტალიურ მედიაკონცერნში GEDI, იტალიურ საფეხბურთო კლუბ „იუვენტუსში“, გადამზღვევ კომპანიაში PartnerRe და სხვ. Exor–ის შემოსავალმა 2021 წელს $136 მლრდ შეადგინა, ხოლო წმინდა აქტივების ფასმა - $32 მლრდ–ს მიაღწია.
Veon და მისი ძირითადი აქციონერი
Veon ჯგუფი არის რუსული ფიჭური კავშირგაბმულობის „ვიმპელკომ“ (სავაჭრო ნიშანი „ბილაინი“), უკრაინული „კიევსტარის“ და ასევე სატელეკომუნიკაციო კომპანიების მფლობელი საქართველოში, ალჟირში, პაკისტანში, ბანგლადეშში, ყაზახეთში, უზბეკეთში, და ყირგიზეთში. ჯგუფის შტაბ ბინა ამსტერდამში მდებარეობს. თავად კომპანია ბერმუდის კუნძულებზეა რეგისტრირებული და ლონდონში გეგმავს გადარეგისტრირებას.
Veonის ძირითადი მფლობელია საინვესტიციო კომპანია LetterOne, რომელიც „ალფა–ჯგუფის“ დამფუძნებლებმა შექმნეს. LetterOne აქციების 47,8%–ს ფლობს Veon–ში, კიდევ 8,3% ჰოლანდიური შტიხტინგი Stichting Administratiekantoor Mobile Telecommunications Investor–ის ინტერესებშია. შტიხტინგი – საკუთრების სპეციალური ფორმაა ჰოლანდიის სამართალში. სტიხტინგი აქციებს მესამე პირის ინტერესებში ფლობს, რომელიც არ ითვლება მის მფლობელად და არ შეუძლია მართვაში მონაწილეობა.
Veon–ის პრობლემები უკრაინაში
ამდენად, Exor სიდიდით Veon–ის მეორე აქციონერი გახდა LetterOne–ის შემდეგ.
ბოლო დროს Veon–ს სერიოზული პრობლემები აქვს. პირველ რიგში, კომპანიის ბიზნესი ძალიან არის დამოკიდებული რუსეთსა და უკრაინაზე. რუსეთში Veon–ს 49 მლნ აბონენტი ჰყავს (22%), უკრაინაში – 33 მლნ (11%). „ვიმპელკომში“ 29 ათასი ადამიანი მუშაობს, „კიევსტარში“ - 4 ათასი. 2021 წლის შემოსავლის ნახევარი რუსეთზე მოდიოდა, უკრაინაზე – 13%. შედეგად, სარეიტინგო კომპანიამ Fitch „ნაგავამდე“ დასწია Veon–ის რეიტინგი.
სანქციები Veon–ის ძირითადი დამფუძნებლების წინააღმდეგ
Veon–ის კიდევ ერთი პრობლემა სანქციებს უკავშირდება. მიხაილ ფრიდმანი, რომელიც „ალფა–გრუპის“ სამეთვალყურეო საბჭოს თავმჯდომარის პოზიციას იკავებდა ბოლო დრომდე, ჯერ ევროკავშირის სანქციების ქვეშ მოხვდა, ხოლო შემდეგ დიდმა ბრიტანეთმაც დაუყადაღა აქტივები. ერთ–ერთ ბოლო ინტერვიუში ფრიდმანი წუხდა, რომ დამლაგებლისთვის გადასახდელი ფულიც აღარ დარჩა.
შემდეგ სანქციებში მოხვდნენ ალეკსეი კუზმიჩევი და გერმან ხანი, რომლებიც ფრიდმანთან ერთად „ალფა–გრუპისა“ და LetterOne–ს დამფუძნებლები არიან.
თავად კომპანია Veon–ში აცხადებენ, რომ მათზე არ ვრცელდება სანქციები და არ ჰყავთ მაკონტროლებელი აქციონერი.
მიუხედავად ამისა, კომპანიის აქციები ფასი მესამედამდე დავარდა. თუ 2022 წლის დასაწყისში ერთი აქციის ფასი $1,7–ს შეადგენდა, დღეს მხოლოდ $0,6 ღირს.
cnews.ru