„ფლანგვის დეტექტორმა“ მორიგი კვლევა გამოაქვეყნა. არასამთავრობო ორგანიზაციის ინფორმაციით, შესყიდვების სააგენტომ საფეხბურთო მოედნების გასანათებელი მოწყობილობებისა და თანმდევი მომსახურების შესყიდვის მიზნით ტენდერი გამოაცხადა, რომელშიც ერთი დღის წინ დაფუძნებულმა კომპანიამ გაიმარჯვა.
„ფლანგვის დეტექტორის“ მიერ გამოქვეყნებულ მასალაში ვკითხულობთ:
2022 წლის 22 ნოემბერს სახელმწიფო შესყიდვების სააგენტომ 2,725,000 ლარის ღირებულების ტენდერი გამოაცხადა. შესყიდვის თანახმად, სააგენტო ფეხბურთში უეფას 21 წლამდელთა 2023 წლის ახალგაზრდული ჩემპიონატის ჩასატარებლად, საქართველოს ტერიტორიაზე არსებული საფეხბურთო მოედნების გასანათებელი მოწყობილობებისა და თანმდევი მომსახურების შესყიდვას გეგმავს.
მიმწოდებელმა კომპანიამ სანათების მონტაჟი და შემდგომ გასწორება-დამიზნება უნდა განახორციელოს ტექნიკური ცენტრების „ბასა", ბათუმი #1, ბათუმი #2 , ქობულეთისა და წყალტუბოს საფეხბურთო მოედნებზე, დავით პეტრიაშვილის სახელობის არენაზე.
ტენდერში 5 კომპანია იღებდა მონაწილეობას. საბოლოოდ კი ყველაზე დაბალი ფასის (1,896,000 ლარი) შეთავაზების მქონე კომპანიამ, შპს „გლობალ იმპორტ ჯგუფმა“ გაიმარჯვა, რომელიც რამდენიმე დღის დაფუძნებული კომპანიაა. სწორედ ამ ფაქტმა მიიპყრო ჩვენი ყურადღება.
როდესაც ახლად დაფუძნებული კომპანია სახელმწიფო შესყიდვებში მონაწილეობს და იმარჯვებს, ყოველთვის ჩნდება კითხვის ნიშნები, რადგან მსგავსი გარემოება მაღალი კორუფციული რისკის შემცველია.
სატენდერო დოკუმენტაციის მიხედვით, კომპანიას არ მოეთხოვებოდა გამოცდილება. ცხადია კომპანიის გამოცდილება მნიშვნელოვანწილად განაპირობებს შესრულებული სამუშაოს ხარისხსაც. მიუხედავად იმისა, რომ ტენდერის ღირებულება 2,725,000 იყო, სააგენტომ გამოცდილება არ მოითხოვა.
მნიშვნელოვანია, რომ კომპანიის დაფუძნების თარიღიდან გამომდინარე ფაქტობრივად შეუძლებელია, გამარჯვებულ კომპანიას რაიმე სახის გამოცდილება ჰქონდეს. აღსანიშნავია, რომ შპს „გლობალ იმპორტ ჯგუფი“ 2022 წლის 29 ნოემბერს არის დაარსებული, ზუსტად იმ დღეს, როდესაც აღნიშნულ ტენდერზე წინადადებების მიღება დაიწყო. კომპანიას ერთი დირექტორი ჰყავს, გიორგი ზაქარიაძე, ხოლო 100%-იანი წილის მფლობელი დავით ჯაფარიძეა. სადამფუძნებლო შეთანხმებაში არაფერია ნათქვამი კომპანიის საქმიანობის სფეროს შესახებ. საინტერესოა ის ფაქტი, რომ ტენდერზე წინადადებების მიღება 29 ნოემბერს დაიწყო და 30 ნოემბერს დასრულდა, შესაბამისად, გამოდის, რომ 1 დღის დაარსებულმა კომპანიამ შეძლო ტენდერში გამარჯვება და ხელშეკრულების გაფორმება.
წყარო:
შესყიდვა CON220000359
შპს „გლობალ იმპორტ ჯგუფი“ https://bit.ly/3GXErMe