აი უკვე 8 წელია, უკრაინა რუსეთთან და პრორუს უკანონო შეიარაღებულ ფორმირებებთან ომობს და ჯერ კიდევ ამერიკის ავღანეთიდან ქაოტურ გაქცევამდე, კიევში გაჩნდა მოლოდინები, რომ ბაიდენის ხელმძღვანელობით, ამერიკა აქცენტს სხვა საკითხებზე გადაიტანს, ხოლო უკრაინა განზე დარჩებოდა.

ამის პირველი ნიშანი ჯერ კიდევ გაზაფხულს გამოჩნდა, როდესაც ვაშინგტონმა კიევთან ყოველგვარი კონსულტაციების გარეშე რუსულ გაზსადენ „ ჩრდილოეთის ნაკადი-2“-ს შეჩერებაზე უარი საბოლოოდ განაცხადა.

ახალი რუსული მილსადენი, რომელიც უკვე თითქმის მზადაა, უკრაინას ტრანზიტიდან მიღებული მილიარდების გარეშე დატოვებს, ხოლო ევროპის დამოკიდებულებას რუსულ გაზზე კიდევ უფრო გაზრდის.

ვაშინგტონს ამ პროექტის ამუშავება არ მოსწონს, თუმცა, გერმანიასთან ნორმალური ურთიერთობების შენარჩუნებისთვის, ამერიკამ მის ამუშავებაზე მდუმარე თანხმობა გასცა.

კიევში სჯერათ, რომ ამერიკა მათ არ მიატოვებს და ამაზე თავად ამერიკელებიც საუბრობენ - მათი აზრით, უკრაინა და ავღანეთი - განსხვავებული საკითხებია, რადგანაც ავღანეთისგან განსხვავებით, ამერიკელი ჯარისკაცები უკრაინაში არ იღუპებიან, თანაც კიევის ეკონომიკური დახმარება შტატების ბიუჯეტს ავღანეთზე გაცილებით იაფი უჯდება - მაქსიმუმ $300 მლნ წელიწადში.

თუმცა, კიევშიც, ვაშინგტონშიც და მოსკოვშიც ამერიკული ჯარის პანიკური გაქცევა ავღანეთიდან შტატების მხრიდან მოკავშირეების მხარდაჭერის შემცირების შესაძლებლობად აღიქვეს.

მაგალითად, რუსეთის უსაფრთხოების საბჭოს თავმჯდომარემ ნიკოლაი პატრუშევმა განაცხადა, რომ ვაშინგტონი ბოლოს და ბოლოს უკრაინის პროდასავლურ მთავრობას მიატოვებს.

„ავღანეთის ამერიკის მოკავშირის სტატუსმა ვერ უშველა და იგივე ელოდებათ ამერიკული არჩევანის მომხრეებს უკრაინაშიც“, - განაცხადა რუსმა მაღალჩინოსანმა.

თუმცა, უკრაინის პრეზიდენტის ადმინისტრაციის უფროსმა ტიმოფეი მილოვანოვმა განაცხადა, რომ ავღანეთისგან განსხვავებით, უკრაინა შემდგარი, ცივილიზებული სახელმწიფოა, რომელიც დამოუკიდებლობისთვის იბრძვის და რომელმაც ევროპის უსაფრთხოებისთვის ძალიან ბევრი გააკეთა.

დასაწყისში ბაიდენის არჩევამ კიევს დონალდ ტრამპთან შედარებით უფრო ძლიერი მხარდაჭერის იმედი გაუჩინა, თუმცა, ყველაფერი საპირისპიროდ წარიმართა. ტრამპი, კიევთან რთული ურთიერთობების მიუხედავად, უკრაინას სამხედრო დახმარებას უწევდა, და ეს მაშინ, როდესაც ობამას ადმინისტრაცია, სადაც ბაიდენის ვიცე-პრეზიდენტი იყო, ამაზე უარს აცხადებდა.

ცივი შხაპის როლი სწორედ „ჩრდილოეთის ნაკადი-2“-მა შეასრულა - ვაშინგტონმა თავისი მოკავშირის აზრი არათუ არ გაითვალისწინა, არამედ ამ საკითხზე მას საერთოდ არ გაესაუბრა. ეს ცალსახად ცუდის ნიშანი იყო.

„გაზპრომის“ მილსადენისთვის მწვანე შუქის ანთების და ბერლინთან არაფრის მომცემი გარიგების დადების გამო, ბაიდენის ადმინისტრაცია ორპარტიული მწვავე კრიტიკის ობიექტი გახდა.

ამჟამად კიევს და ვაშინგტონს შორის ურთიერთობების ჰაერშია გამოკიდებული და ეს საშიშია ქვეყნისთვის, რომელიც რუსეთთან ომის მდგომარეობაში იმყოფება.

ვაშინგტონმა ბოლოს და ბოლოს უნდა გაიაზროს, რომ უკრაინას რუსეთის მხრიდან გრძელვადიან საფრთხეებთან გამკლავებისთვის ამერიკის მტკიცე სამხედრო-პოლიტიკური დახმარება და მილიარდობით დოლარი სჭირდება.

ft.com