ფინანსთა მინისტრმა მთავრობის სხდომის შემდეგ გამართულ ბრიფინგზე განაცხადა, რომ საწვავზე ფასის შემცირებას ელოდება. მისივე თქმის საწვავის ფასის ინდიკატორი ლარის კურსი და მოსაწოდებელ საწვავთან დაკავშირებით დადებული კონტრაქტებია.
“საწვავის ფასის ინდიკატორი გარკვეულწილად არის ის კონტრაქტები რომლებიც იდება სამომავლო პერიოდში მოსაწოდებელ საწვავთან მიმართებაში. ამ კონტრაქტზე ფასი შემცირებულია, ვიდრე ეს იყო იანვარში და თებერვალში როდესაც პლატსის ფასმა რამდენიმე წლის მაქსიმუმს მიაღწია. ბუნებრივია, ვალუტის კურსიც ახდენს შესაბამის კორექტირებას, თუმცა ამ მიმართულებით ვხედავთ რომ სტაბილურობა შეინიშნება. ბუნებრივია, ეს ყველაფერი ქვეყანაში არსებულ საწვავის სარეალიზაციო ფასზე აისახება. ერთი მხრივ, შემცირებული საწვავის ფასი ახალ კონტრაქტებში და მეორე მხრივ, შედარებით დასტაბილურებული ლარის კურსი აჩენს მოლოდინს რომ საწვავის ფასის კორექტირება უნდა მოხდეს შემცირების მიმართულებით”, - აცხადებს ხუციშვილი.