„2021 წლის სახელმწიფო ბიუჯეტში ცვლილებები გაზრდის მიმართულებით ხდება და ამ გაზრდილი ბიუჯეტიდან უდიდესი ნაწილი არის ჯანდაცვის მიმართულების დაფინანსება - 600 მლნ ლარით იზრდება ჯანდაცვის სამინისტროს ბიუჯეტი და ჯამში ის 6 მილიარდ 93 მილიონი ლარი იქნება“, - განაცხადა ფინანსთა მინისტრის პირველმა მოადგილემ გიორგი კაკაურიძემ ჯანმრთელობის დაცვისა და სოციალურ საკითხთა კომიტეტის დღევანდელ სხდომაზე, სადაც „საქართველოს 2021 წლის სახელმწიფო ბიუჯეტის შესახებ“ კანონში ცვლილების პროექტი განიხილეს. ინფორმაციას პარლამენტის პრესსამსახური ავრცელებს.
გიორგი კაკაურიძის ინფორმაციით, გაზრდილი ბიუჯეტიდან ყველაზე დიდი წილი - 446 მილიონი ლარი - პანდემიასთან დაკავშირებული ხარჯებისთვისაა გამიზნული და ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს ბიუჯეტში წელს ამ მიზნით ჯამში 846 მლნ ლარი იქნება გათვალისწინებული. იგი რამდენიმე კომპონენტს მოიცავს: მკურნალობის ხარჯებს, საწოლ-ფონდის მობილიზებას, ტესტებს, პირადი დაცვის საშუალებებს, ვაქცინაციისთვის საჭირო თანხას. „თანხა სრულად მობილიზებულია იმისთვის, რომ მოსახლეობის 60%-ის აცრა შევძლოთ. შესაბამისი მოლაპარაკებებიც დასრულებულია და სამედიცინო სექტორი მზად არის იმისთვის, რომ ვაქცინაციის პროცესი განხორციელდეს და ერთ-ერთი მთავარი კომპონენტი რაც რჩება, არის მოსახლეობის ჩართულობის საკითხი. ამ კუთხით მუშაობის გააქტიურება მოუწევს როგორც სამინისტროს, ასევე თითოეულ ჩვენგანს, რომ ის შედეგი მივიღოთ, რაც საბოლოო ჯამში პანდემიას შედარებით უმტკივნეულოდ გადაგვატანინებს“, - განაცხადა გიორგი კაკაურიძემ.
მისივე თქმით, დამატებითი დაფინასება გათვალისწინებულია შემდეგი მიმართულებებითაც: ესაა იმუნიზაციის, იშვიათი დაავადებების, დიალიზის პროგრამები, დევნილთა და ეკომიგრანტების საცხოვრებელი სახლებით უზრუნველყოფა. ბავშვთა დახმარება გაორმაგდა და 1 ივლისიდან, ნაცვლად 50 ლარისა, გაიცემა 100 ლარი. გაიზარდა დახმარების მიმღებთა რაოდენობა, რაც 215 ათას ბენეფიციარს შეადგენს. 2021 წლის სახელმწიფო ბიუჯეტის ცვლილებებით, ბიუჯეტის შემოსულობები - 1 175 მლნ ლარით, ხოლო გადასახდელები 1 114.3 მლნ ლარით იზრდება, რაც მეორე კვარტლის დასაწყსიდან ეკონომიკის გაუმჯობესების მიმართულებით რადიკალურად შეცვლილმა მდგომარეობამ განაპირობა. ჯანმრთელობის დაცვისა და სოციალურ საკითხთა კომიტეტის თავმჯდომარის, დიმიტრი ხუნდაძის განცხადებით, ბიუჯეტის ცვლილებათა პროექტს მხარს უჭერს, თუმცა შემდეგი ბიუჯეტის დაგეგმარებისთვის კომიტეტს აქვს გარკვეული რეკომენდაციები და წინადადებები. „იმედი გვაქვს, ერთობლივი მუშაობით, რეალობის ფარგლებში, ჩვენ შევძლებთ ბევრი პრობლემის გადაჭრას, მაგრამ არის საკითხები, რომლებიც აუცილებლად დროულად გადაწყვეტას საჭიროებს, მათ შორისაა ქვეყნის მასშტაბით გადაუდებელი სამედიცნო ბრიგადების სახელფასო უთანაბრობის საკითხი“, - განაცხადა დიმიტრი ხუნდაძემ. კომიტეტმა „საქართველოს 2021 წლის სახელმწიფო ბიუჯეტის შესახებ“ საქართველოს კანონში ცვლილების შეტანის თაობაზე“ კანონპროექტს მხარი დაუჭირა.