ფინეთის ხელისუფლება რუსებისთვის, მათ შორის მათთვის, ვინც ქვეყანაში უძრავ ქონებას ფლობს, ვიზების გაცემის პირობებს კიდევ უფრო ამკაცრებს. ამის შესახებ ფინეთის პრეზიდენტმა, საული ნიინისტემ განაცხადა, რასაც ადგილობრივი მაუწყებელი, Yle ავრცელებს.
მისი თქმით, აქამდე აგარაკის, ბინის ან სხვა სახის უძრავი ქონების ფლობა ფინეთში ვიზის მიღების ხელშემწყობ ფაქტორად განიხილებოდა. პრეზიდენტმა აღნიშნა, რომ უძრავი ქონების რუსი მფლობელებისთვის ვიზის გაცემის გართულება რუსეთთან სავიზო რეჟიმის გამკაცრების ყოვლისმომცველი ღონისძიებების მხოლოდ მცირე ნაწილია. იქვე მან აღიარა, რომ ახალი შეზღუდვების შედეგად ქვეყანაში უძრავი ქონების შეძენის მიმართ რუსების ინტერესი შესაძლოა, შემცირდეს.
კითხვაზე, უნდა მიბაძოს თუ არა ფინეთმა ბალტიისპირეთის ქვეყნებსა და პოლონეთს, რომლებმაც რუსებისთვის ტურისტული ვიზების გაცემაზე მთლიანად უარი თქვეს, საული ნიინისტემ აღნიშნა, რომ სავიზო საკითხი სუბიექტურ კი არა, ევროკავშირის მასშტაბით საერთო გადაწყვეტილებას უნდა წარმოადგენდეს, რადგან, პრეზიდენტის თქმით, ამჟამად შენგენის ბევრი ქვეყანა რუსებზე ფინეთზე უფრო გულუხვად გასცემს ვიზებს.
9 სექტემბერს ევროპულმა საბჭომ რუსეთთან გამარტივებული სავიზო რეჟიმის გაუქმებაზე ევროკავშირის საგარეო საქმეთა მინისტრების გადაწყვეტილება დაამტკიცა, რომელიც 12 სექტემბრიდან შევიდა ძალაში. შეზღუდვები გულისხმობს სავიზო მოსაკრებლის 35-დან 80 ევრომდე გაზრდას, ვიზაზე განაცხადის დროს დამატებითი დოკუმენტების წარდგენასა და გაცემის ვადის გაზრდას.
ფინეთმა პირობა დადო, რომ რუსებზე გაცემული ვიზების რაოდენობას დღეში 1000-დან 100-200-მდე შეამცირებს. ლიეტუვა, ლატვია და ესტონეთი შეთანხმდნენ, რომ ამ ქვეყნებში რუსეთის მოქალაქეების შენგენის ვიზებით შესვლა სექტემბრის შუა რიცხვებიდან აიკრძალება. მაგალითად, ტალინი ამ აკრძალვას 18-19 სექტემბრის ღამეს აწესებს.