ფინეთში დააყადაღეს რუსეთის პრეზიდენტთან დაახლოებული რუსი მილიარდერების, ბორის და არკადი როტენბერგებისა და ასევე Yandex-ის აქტივები. ამ სოციალური პლატფორმის ერთ-ერთი დამფუძნებელი არკადი ვოლოჟი ევროკავშირის მიერ არის სანქცირებული, ამის შესახებ ხუთშაბათს ფინური გამოცემა Helsingin Sanomat-ი იტყობინება.
გამოცემის ინფორმაციით, ევროკავშირის სანქციების ქვეშ მყოფი ბიზნესმენების აქტივების დაყადაღების შესახებ გადაწყვეტილებები აგვისტო-სექტემბრის დასაწყისში იქნა მიღებული.
დამსჯელი ზომები შეეხო როტენბერგებთან დაკავშირებული långvik Capital-ის აქციებს და რუსი მილიარდერების აქციებს ორ სხვა კომპანიაში. ამრიგად, ფინეთის ხელისუფლებამ მოიპოვა კონტროლი ჰელსინკიში დაფუძნებულ Ice Arena Helsinki Halli-სა და კომპანია Långvik-ის აქციებზე, რომლებიც სასტუმრო კომპლექსს მართავს.
რაც შეეხება Yandex-ის ფინეთის სამმართველოს დაპატიმრებულ ანგარიშებს, ამასთან დაკავშირებით გამოცემა Forbes-ი აღნიშნავს, რომ კომპანიის ქვეგანყოფილება ფლობს ტაქსების ქსელ Yango-სა და მონაცემთა დამუშავების ცენტრს ქალაქ მანცალაში.
არკადი ვოლოჟი ევროკავშირის სანქციების სიაში ივნისის დასაწყისში შევიდა, როდესაც ბრიუსელმა უკრაინის ომის გამო რუსეთის წინააღმდეგ შეზღუდვების მეექვსე პაკეტი დაამტკიცა. ამის შემდეგ ვოლოჟმა Yandex-ში ყველა თანამდებობა დატოვა. თავად კომპანია არ იყო სანქცირებული. მაგრამ ფინეთის ხელისუფლება ყადაღის შესახებ თავის გადაწყვეტილებაში დაეყრდნო ევროკავშირის არგუმენტებს, რომ Yandex -ი პასუხისმგებელია იმაზე, რომ საძიებო საქმიანობაში უპირატესობას ანიჭებს „რუსეთის სახელმწიფო მედიას და სახელმწიფო დღის წესრიგს“ და, ასევე, შლის ისეთ კონტენტს, რომლებშიც ქვეყნის ხელისუფლება უკრაინის წინააღმდეგ აგრესიული ომის გამოა გაკრიტიკებული.
აქტივები
