საერთაშორისო სარეიტინგო სააგენტო Fitch-ის შეფასებით, წელს საქართველოში ძლიერი შიდა და საგარეო მოთხოვნის, ასევე გაზრდილი ტურიზმისა და ქვეყანაში შემოსული ათასობით მიგრანტის ფულადი გზავნილის გამო მაღალი ეკონომიკური ზრდა იქნება. ორგანიზაციის პროგნოზით, 2022 წლის ზრდა, სავარაუდოდ, 10.9% იქნება. ამასთან, ზრდა 2023 წლისთვის 5.3%-მდე, ხოლო 2024 წლისთვის 4.7%-მდე უნდა შემცირდეს.
ორგანიზაცია საქართველოს სახელმწიფოს საკრედიტო რისკს უცვლელად, “BB” დონეზე აფასებს, ასევე უცვლელია ქვეყნის საკრედიტო რეიტინგის “სტაბილური” მოლოდინი. Fitch-ი ასევე მოელის, რომ 2022 წლის განმავლობაში საქართველოში ინფლაციის საშუალო დონე 11.5% იქნება, ხოლო მონეტარული პოლიტიკა კი წლის განმავლობაში გამკაცრებულ დონეზე შენარჩუნდება.
ანალიტიკოსი და ეკონომიკის მეცნიერებათა დოქტორი ნიკა შენგელია „კომერსანტთან“ ამბობს, რომ სარეიტინგო კომპანიის პროგნოზი გადაჭარბებულია.
„Fitch-ს მოლოდინი გადაჭარბებულია. ზოგადად ყველასთვის ცნობილია, რომ სარეიტინგო კომპანიებს პოლიტიკური დანიშნულებაც აქვს ზოგ შემთხვევაში. ჩვენი პროგნოზით, ეკონომიკურმა ზრდამ 8.5%-ს არ უნდა გადააჭარბოს, თუმცა რეალური ზრდა ჩვენთან არ არის და ამას მოსახლეობა ვერ გრძნობს. ეკონომიკური ზრდა რამდენიც არ უნდა იყოს, ინფლაცია უფრო მეტია და ის „გვიჭამს“ მთლიან ზრდას. რეალური ინფლაცია 30%-დან 35%-მდეა თუ ავიღებთ პირველადი მოხმარების საქონელსა და მომსახურებას, რასაც სტატისტიკა აქვეყნებს ეს არის საშუალო მაჩვენებელი, მოსახლეობას კი სწორედ ის პირველადი მოხმარების პროდუქტების ფასები აწუხებს, ვიდრე სხვა დანარჩენი“, — ამბობს ნიკა შენგელია.
როგორც „კომერსანტს“ Galt&Taggart-ში განუცხადეს, თუ ძლიერი საგარეო შემოდინებების დინამიკა წლის ბოლომდე გაგრძელდა, წლის მე-2 ნახევარში გლობალური ზრდის შენელების მიუხედავად, ოპტიმისტურ სცენარში საქართველოს ეკონომიკურ ზრდას 10.6%-ზე პროგნოზირებენ.ის რეიტინგი (BB), რომელიც დღეს საქართველოს აქვს მინიჭებული, წლების განმავლობაში მნიშვნელოვნად არ შეცვლილა, ამის მიზეზი კი ქვეყნის მიმდინარე ანგარიშის მაღალი დეფიციტი, რეზერვების დაბალი დონე, არასახარბიელო მშპ-ს ოდენობა ერთ სულ მოსახლეზე და საგარეო ვალის მაღალი მაჩვენებელია.
პანდემიის დაწყების შემდეგ Fitch-მა საქართველოს შესახებ საკუთარი ანგარიში რამდენჯერმე განაახლა. თავდაპირველად, 2020 წლის აპრილში ქვეყნის საკრედიტო რეიტინგის პროგნოზი „სტაბილურიდან“ „ნეგატიურით“ შეიცვალა, ხოლო 2021 წლის აგვისტოში საკრედიტო რეიტინგის მოლოდინი კვლავ `სტაბილურით” შეიცვალა. ახალ ანგარიშშიც ეს მოლოდინი უცვლელია. საერთაშორისო რეიტინგებში პოზიციების გაუმჯობესება პოზიტიურად უნდა მოქმედებდეს ქვეყნის საინვესტიციო კლიმატზე, მაგრამ თუ მონაცემებს ჩავხედავთ, დავინახავთ, რომ ეს ასე სულაც არ არის და თითქოს გაუმჯობესებული რეიტინგების ფონზე (რომელიც მხოლოდ B ჯგუფში ცვლილებას გულისხმობს), ქვეყანაში ინვესტიციები წლიდან წლამდე მცირდება.